Telefonyńyzǵa qysqa ýaqytta kóp habarlama kelse, alaıaqtar bolýy múmkin – polıtsııa
SEMEI. KAZINFORM – Abaı oblysynyń polıtseıleri azamattarǵa telefon nómirine jappaı SMS-habarlamalar keletin «SMS-bombıng» jaǵdaıynda saqtyq sharalaryn saqtaý qajettigin eskertti.
- SMS-bombıng kezinde telefonǵa qysqa ýaqyt ishinde kóptegen habarlama kelýi múmkin. Olardyń arasynda ártúrli servısterge tirkelý týraly habarlamalar, jarnamalyq usynystar jáne kirýdi rastaý kodtary bolýy yqtımal, - delingen aqparatta.
Osyndaı jaǵdaıda alaıaqtar telefon arqyly ózderin uıaly baılanys operatorynyń qyzmetkeri retinde tanystyrady. Ol jappaı SMS-shabýyldy anyqtaǵanyn habarlap, abonentke «antıspam» qyzmetin qosýdy usynyp, kelgen SMS-kodty aıtýdy suraýy múmkin.
- SMS arqyly kelgen rastaý kodyn basqa adamdarǵa bermeńiz. Mundaı kodtar akkaýntqa kirýdi nemese belgili bir operatsııany rastaý úshin paıdalanylýy múmkin. Eger telefonǵa qysqa ýaqyt ishinde kóp mólsherde habarlama kelse sabyr saqtap, kelgen kodtardy eshkimge habarlamańyz. Qajet bolǵan jaǵdaıda telefondy ýaqytsha avıarejımge aýystyryńyz. Mobıldi baılanys operatoryna habarlasyp, jaǵdaı týraly aqparat berińiz, - delingen habarlamada.
Eger SMS-kod bógde adamǵa aıtylyp qoısa, tıisti servıske, bankke nemese quqyq qorǵaý organdaryna dereý habarlasqanyńyz jón.
Eske salsaq, osyǵan deıin Shyǵys Qazaqstanda alaıaq bir páterdi 25 ret «satqany» habarlanǵan.
