Telefonǵa joldanǵan SMS áskerge shaqyrý týraly resmı habarlama retinde tanylady

ASTANA. KAZINFORM — «Áskerı qyzmetke shaqyrýdy uıymdastyrý men júrgizý qaǵıdalaryn bekitý týraly» QR Úkimetiniń 2012 jylǵy mamyrdaǵy qaýlysyna ózgerister engizýge qatysty tıisti qujattyń jobasy jarııalandy. 

Osy jobanyń maqsaty azamattardy áskerı qyzmetke shaqyrýdy uıymdastyrý men júrgizýde biryńǵaı tásil engizýge arnalǵan. 

— Joba áskerı qyzmetke shaqyrýdy uıymdastyrý men júrgizý tártibin naqtylaýǵa, áskerge shaqyrýdy keıinge qaldyrýdy memlekettik qyzmet kórsetý arqyly iske asyrýǵa, áskerı qyzmetke jatatyn azamattardyń telefon nómirlerine SMS-habarlamany habarlandyrýdyń tıisti túri dep tanytýǵa baǵyttalǵan, — delingen Ashyq NQA portalynda jarııalanǵan qujatta. 

Qujat jobasy bıylǵy 9 qyrkúıekke deıin qoǵamdyq talqylaýda bolady.

Eske salsaq, byltyr jyl sońynda áskerge shaqyrý, bosatý jáne keıinge qaldyrý SMS-habarlama arqyly jetkiziletini málim boldy.