Telefon ustaý, beldik taqpaý: Almatyda kameralar jol erejesin buzýdyń jańa túrlerin tirkeıdi
ALMATY. KAZINFORM – 12 naýryzdan bastap Qazaqstan Respýblıkasynyń Ákimshilik quqyq buzýshylyq týraly kodeksiniń 31-babyna Qazaqstan Respýblıkasynyń Tsıfrlyq kodeksi aıasynda qabyldanǵan ózgerister kúshine enedi.
– Jańa normalar júrgizýshiler úshin qosymsha shekteýler engizbeıdi jáne talaptardy kúsheıtpeıdi. Zań talaptary ózgerissiz qalady – tek quqyq buzýshylyqtardy tirkeý tásili jańarady. Basty maqsatymyz – zamanaýı tehnologııalardyń kómegimen joldaǵy tártipti arttyryp, azamattardyń qaýipsizdigin qamtamasyz etý, - dedi Almaty polıtsııasynyń Profılaktıkalyq jumysty úılestirý basqarmasynyń ókili Aıdyn Merkimbaev.
Buǵan deıin avtomatty júıeler quqyq buzýshylyqtyń 6 túrin tirkeıtin: jyldamdyqty arttyrý, baǵdarshamnyń tyıym salatyn sıgnalyna ótý, jol belgileri men tańbalaryn saqtamaý, durys toqtamaý nemese turaq erejesin buzý, ozý qaǵıdalaryn buzý jáne jaıaý júrginshilerge jol bermeý. Endi olardyń múmkindigi keńeıtiledi. Avtomatty tirkeý kameralary qosymsha quqyq buzýshylyqtardy, onyń ishinde kólik quralyn basqarý kezinde uıaly telefon paıdalaný jáne qaýipsizdik beldigin taqpaý derekterin de anyqtaı alady.
Sonymen qatar mindetti saqtandyrý polısiniń bolmaýy, tehnıkalyq baıqaýdyń merziminiń ótýi jáne zańnamada kózdelgen ózge de qujattyq sıpattaǵy buzýshylyqtar avtomatty túrde tirkeletin bolady.
Eske salaıyq, buǵan deıin Almaty oblysynda ortasha jyldamdyq kameralary ornatylǵanyn jazǵanbyz.
