Aqsha aýdarymdary men QR tólemderi: Qazaqstanda jańa ereje qashan kúshine enedi
ASTANA. KAZINFORM — Ulttyq Bank ekinshi deńgeıli banktermen birge mobıldi jáne bankaralyq QR-tólemderdi damytýdyń jańa kezeńin talqylady.
Ulttyq Bank Tóraǵasy Tımýr Súleımenov ekinshi deńgeıli bankterdiń basshylarymen kezdesý ótkizip, Bankaralyq mobıldi tólemder júıesin (budan ári — BMTJ) damytý jáne telefon nómiri men biryńǵaı QR-kod arqyly júzege asyrylatyn bankaralyq aýdarym servısterin iske qosý máselesin talqylady.
— Kezdesýde «Ulttyq tólem korporatsııasy» AQ bankaralyq aýdarym júıesiniń qazirgi nátıjesi men aldaǵy damý josparyn tanystyrdy. Búginde bul júıege ekinshi deńgeıli bes bank qosylǵan. Alǵashqy qatysýshy-bankter qosylǵan kezden beri telefon nómiri arqyly jasalatyn bankaralyq aýdarym kólemi turaqty túrde ósip keledi. Taǵy tórt bank synaqtan ótý jáne tehnıkalyq turǵyda biriktirý kezeńinde tur. Barlyq ekinshi deńgeıli bank bul júıege 2025 jylǵy qyrkúıekten qalmaı qosylady dep kútiledi, — delingen habarlamada.
Budan bólek, jıynda BMTJ ınfraqurylymynyń taǵy bir mańyzdy elementi — bankaralyq QR-tólemderdi engizý máselesi talqylandy. Alaıaqtardan qorǵaý tetigin kúsheıtý men júıeniń senimdi jumys isteýine jaǵdaı jasaý maqsatynda klıent derekterin berý formaty qaıta qaraldy. Endi bul formatta kúmándi jáne alaıaqtyq operatsııalardy qadaǵalaýǵa múmkindik beretin tolyq ári qurylymdalǵan aqparat bar. Sondaı-aq, QR-tólemder servısine qosylý boıynsha bankterge qoıylatyn talap kúsheıtildi. Bul sharalar júıege qatysýshy taraptar arasynda sapanyń, qaýipsizdik pen senimniń biryńǵaı standartyn qalyptastyrady.
Jıyndy qorytyndylaı kele, taraptar QR-tólem formattaryn kelisip, tehnıkalyq jumystar aıaqtalǵan soń barlyq bank qosylǵan júıeni tolyqtaı iske qosý 2025 jyldyń sońyna deıin aıaqtalady degen boljam aıtty.
Bankaralyq mobıldi tólemder júıesi (BMTJ) «Ulttyq tólem korporatsııasy» AQ bazasynda ázirlenip jatyr jáne klıentter men bızneske yńǵaıly ári qaýipsiz esep aıyrysý quraldaryn usynady. Bul júıe tranzaktsııalardy barynsha ashyq etip, qarajatty joǵary deńgeıde qorǵaýǵa múmkindik beredi, sondaı-aq turaqty jáne zamanaýı qarjy ınfraqurylymyn qalyptastyrady.
Aıta keteıik, buǵan deıin Ulttyq bank sarapshylar qaýymdastyǵy arasynda júrgizilgen kezekti makroekonomıkalyq saýalnamanyń nátıjesin jarııalady. Brent markaly munaı baǵasy, Qazaqstan ekonomıkasynyń ósimi, ınflıatsııa, bazalyq mólsherleme, taýarlar men qyzmetterdiń eksporty jáne ımporty, sondaı-aq teńge baǵamy – saýalnamanyń negizgi parametri boldy.