Telefon nómirin jarııalaǵan Jetisýdyń bas polıtseıi halyqty ashyq áńgimege shaqyrdy
TALDYQORǴAN.QazAqparat - Almaty oblystyq polıtsııa departamentiniń basshysy, general-maıor Murat Urumhanov áleýmettik jeliden óz paraqshasyn ashty. Ózge oblystardaǵy áriptesteriniń arasynan alǵashqylardyń biri bolyp Feısbýkke tirkelgen general óńir turǵyndaryn ashyq dıalogqa shaqyrdy, dep habarlaıdy QazAqparat tilshisi oblystyq polıtsııa departamentiniń baspasóz qyzmetine silteme jasap.
Sonymen qatar, Murat Urumhanov qyzmettik tikeleı telefon nómirin jarııalap, «tikeleı jelide» azamattardyń ótinishteri men usynystaryn tyńdaýǵa daıyn ekenin jetkizdi.
«HHІ ǵasyr - jańa tehnologııalar men ınternet ǵasyry. Barlyǵymyz da ýaqyt talabyna sáıkes áreket etýimiz qajet. Belsendi bolý, azamattarmen dıalog qurý, ásirese áleýmettik jelilerde baılanys ornatý - zamanaýı talap. Osyǵan oraı, Facebook jelisindegi meniń atyma ashylǵan paraqsha ashyq dıalog qurýǵa jáne halyqpen keleli baılanys ornatýǵa kómektesetini anyq. Sondaı-aq, tyǵyz qarym-qatynas ornatý úshin azamattar polıtsııa qyzmetin odan ári jaqsartý týraly usynystaryn 8-7282-608001 nómiri arqyly maǵan tikeleı qońyraý soǵý arqyly aıta alady»,- dep jazdy Murat Urumhanov paraqshasyndaǵy alǵashqy postynda.
Sonymen qatar, polıtsııa basshysy óziniń jáne orynbasarlarynyń departamenttegi, Quqyq qorǵaý qyzmeti ortalyǵyndaǵy jáne «Nur Otan» partııasyndaǵy azamattardy qabyldaý kestesi týraly jazǵan. 
