Telefon men ámııandy urlatpaý úshin ne isteý kerek — polıtsııa keńesi
ASTANA. KAZINFORM — Qalta urlyǵy — syrt kózge baıqala bermeıtin, biraq sanaýly sekýndta jasalatyn qylmys. Qaskóıge esikti buzý, qulypty ashý nemese uzaq ýaqyt daıyndalý mindetti emes, dep habarlaıdy Abaı oblysy Polıtsııa departamentiniń baspasóz qyzmeti.
Vedomstvo atap ótkendeı, keıde onyń maqsatyna jetýi úshin qoǵamdyq kóliktegi bir sáttik qarbalas, dúkendegi kezek nemese adamnyń telefonyn syrtqy qaltasyna salyp qoıýy jetkilikti.
— Kóbine qalta urylary adam kóp shoǵyrlanǵan jerlerdi tańdaıdy. Qoǵamdyq kólik, aıaldama, bazar, saýda oryndary, jaıaý júrginshiler kóp júretin kósheler — qaskóıler úshin qolaıly orta. Máselen, avtobýsqa mingen kezde jolaýshylardyń nazary kóbine bos orynǵa, jol aqysyna nemese telefonǵa aýyp ketedi. Al dál osy sátti qaskóı óz paıdasyna paıdalanýy múmkin. Adamdardyń bir-birine tyǵyz ornalasýy, kóliktiń qozǵalysy, aıaldamadaǵy qarbalas — munyń barlyǵy urlyqty baıqatpaı jasaýǵa múmkindik beredi, — deıdi tártip saqshylary.
Qylmysker jábirlenýshiniń qaltasyndaǵy telefondy nemese ámııandy baıqatpaı alyp, kelesi aıaldamadan túsip ketýi múmkin. Al jábirlenýshi óziniń zatynan aıyrylǵanyn birneshe mınýttan keıin ǵana ańǵarady.
Ózińizdi qorǵaýdyń qarapaıym joldary
Abaı oblysy Polıtsııa departamenti azamattarǵa qoǵamdyq oryndarda jeke zattaryna muqııat bolýdy eskertedi:
- uıaly telefon men ámııandy kıimniń artqy nemese syrtqy qaltalarynda saqtamańyz;
- aqsha men qujattardy kıimniń ishki, qaýipsiz qaltasyna salyńyz;
- qoǵamdyq kólikte sómkeni aldyńyzda ustańyz;
- rıýkzakty adam kóp jerde arqańyzda emes, aldyńyzda ustaǵan durys;
- sómkeńizdi qaraýsyz qaldyrmańyz;
- qymbat zattardy kózge túsetin jerde ustamańyz;
- beıtanys adamnyń kúmándi áreketine nazar aýdaryńyz;
- telefonmen sóılesip nemese áleýmettik jelige alańdap júrgen kezde jeke zattaryńyzdy baqylaýsyz qaldyrmańyz.
Aıta keteıik, Abaı oblysynda jyl basynan beri 14 qalta urlyǵy tirkeldi.
Osyǵan deıin Almaty áýejaıynda urlyqtan keıin baqylaýǵa alynbaǵan aýmaqtarǵa kamera qoıylǵany belgili boldy.
