Telefon qońyraýynyń kesirinen 400 adam Qaraǵandy ortalyq dúkeninen kóshirildi
QARAǴANDY. QazAqparat - Polıtsııaǵa Qaraǵandy ortalyq ámbebap dúkenine jarylǵysh zat qoıylǵany jaıly habar kelip tústi, dep habarlaıdy «QazAqparat» HAA tilshisi.
«13 qańtar kúni saǵat 10.01-de «102» telefonyna belgisiz er adam habarlasyp, ortalyq ámbebap dúkenge jarylǵysh zat qoıylǵanyn habarlady. Dúkenge barlyq tótenshe qyzmet jiberildi, ortalyq dúken ǵımaratynan 400-ge jýyq adam kóshirildi», - dep habarlady Qaraǵandy oblysy ІІD baspasóz qyzmetiniń jetekshisi Baqytjan Qudııarov.
Polıtsııa qylmyskerdiń izin sýytpaı, 25 jastaǵy Qaraǵandy turǵynyn ustady. QR QK 273-baby boıynsha sotqa deıingi tergeý jumystary bastaldy.
Oqıǵanyń mán-jaıy anyqtalýda. Polıtsııa atalǵan bap boıynsha 6 jylǵa deıin bas bostandyǵynan aıyrý jazasy qarastyrylǵanyn eske salady. «Qońyraý shalmaı turyp, zardabyn oılańyzdar», - deıdi polıtseıler.
