Telefon arqyly sóılesken sózderdiń qupııalylyǵyn buzǵany úshin qylmystyq jaýapkershilik kúsheıtiledi
ashanyń 4-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine azamattardyń jeke ómirine qol suǵylmaýshylyq quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady,
dep habarlaıdy QazAqparat.
Atalǵan zań jobasy memleket azamattarynyń jeke ómirine qol suǵylmaýy, óziniń jáne otbasynyń qupııasy bolýy, jeke salymdary men jınaǵan qarajatynyń, jazysqan hattarynyń, telefon arqyly sóılesken sózderiniń, poshta, telegraf arqyly jáne basqa da joldarmen alysqan habarlarynyń qupııalylyǵynyń saqtalýy sııaqty sharalardy qabyldaýǵa baǵyttalady.
«Ata zańymyzdyń 18-babynda árkimniń jeke ómirine qol suǵylmaýyna quqyǵy barlyǵy belgilengen. Osy bapty iske asyrý boıynsha qosymsha zań deńgeıinde sharalar qabyldaý maqsatynda atalǵan qujat ázirlendi. Bul rette azamattardyń jeke ómiriniń, otbasynyń qupııasyn, sondaı-aq jeke salymdary men jınaǵan qarajatynyń, jazysqan hattarynyń, telefon arqyly sóılesken sózderiniń jáne taǵy basqalarynyń qupııalylyǵyn buzǵany úshin qylmystyq jaýapkershilikti kúsheıtýdi usynyp otyrmyz. Budan basqa, zań jobasy arqyly jedel izdestirý materıaldaryn burmalaǵany úshin qylmystyq jaýapkershilikti engizý kózdelip otyr. Sonymen birge, jedel izdestirý qyzmetiniń qyzmetkerleri úshin jeke ómirge qol suǵylmaýshylyqty qozǵaıtyn málimetterdi jarııalaýǵa qatysty shekteýler aıasy keńeıtiledi», dedi Ádilet vıtse-mınıstri Marat Beketaev.
Onyń aıtýynsha, zań jobasynda jedel izdestirý sharalarynyń zańdylyǵyn, onyń ishinde telekommýnıkatsııa jelileri men poshtalyq baılanys arnalaryndaǵy zańdylyqty qadaǵalaý kezinde prokýrordyń ókilettigin naqtylaý normasy da qamtylyp otyr.
Birinshi oqylymda maquldanǵan zań jobasy ekinshi oqylymǵa ázirleý úshin bas komıtetke tapsyrylady.
