Telefon arqyly adam ómirine arasha túsýge tyrysamyz – TJD dıspecheri

ÓSKEMEN. KAZINFORM – Qandaı da bir qıyn jaǵdaıǵa tap bolyp, qutqarýshylarǵa habarlasqan adammen eń áýeli dıspetcher sóılesedi. Jaýapkershiligi mol bul salada jumys isteý ekiniń biriniń qolynan kelmeıdi. ShQO TJD órt sóndirý qyzmetiniń dıspecheri Ekaterına Bespalovanyń eńbek ótili – 20 jyldan asqan. Jumys ýaqytynda oǵan 10 mınýtta 9 qońyraý kelip túskenin kórdik. Al shırek ǵasyrǵa jýyq ýaqyt ishinde ol qansha qońyraýǵa jaýap bergenin osydan-aq elestete berińiz. 

- Jumystaǵy eń alǵashqy aýysymyńyz esińizde me?

- 2002 jyly qyzmetke kelgen kezde aǵa dıspetcher Vıacheslav Rafısovıch degen kisi tálimgerim boldy. Ol óte myqty adam, naǵyz kásipqoı. Maǵan ne bolsa da dúrbeleńge boı aldyrmaýdy, árdaıym sabyr saqtap, bolyp jatqan jaǵdaıdy qysqasha baıandaýdy, kezekshilikke únemi jaqsy kóńil-kúımen kelýdi úıretti. Eń alǵashqy aýysymym esimde qalmapty, biraq ońaı bolmaǵynyn bilemin. 

- Jaqsy dıspecher bolý úshin qandaı qabilet kerek?

- Eń áýeli siz óz jumysyńyzdy jaqsy kórýińiz qajet. Óz mindetterińizdi búge-shigesine deıin bilýińiz tıis. Konstıtýtsııany saqtap, ofıtser ataǵyna laıyqty bolý – bizge qasıetti borysh. Odan keıin adamdarǵa degen janashyrlyq, meıirbandyq kerek dep oılaımyn. Streske tózimdilik te dıspetcherdiń boıynan tabylýy tıis qabilet. 

- Otbasyńyz mundaı qıyn jumysqa qalaı qaraıdy?

- Árıne, túsinistik tanytady. Sebebi joldasym bir kezderi órt sóndirý qyzmetinde jumys istegen. Ol bárin biledi. Al aǵam «sen jumysqa emes, qyzmetke barasyń. Sondyqtan adal qyzmet et» degen edi. Muny árqashan este ustaýǵa tyrysamyn. 

- Qyzmettegi eń qıyn degen jaǵdaılar týraly aıtyp berseńiz...

- Ol oqıǵa esime túsken saıyn kózime jas alamyn. 2020 jyly qys kezinde Shemonaıha aýdanynda qar basyp qalǵan balany izdeý jumystary boldy. Bizdiń qutqarýshylar balanyń denesin tapty. Ózim de ana bolǵandyqtan osy jaıtty ózime jaqyn qabyldadym. Óte aýyr boldy. Al, órtterdiń qaısysy erekshe bolǵanyn aıta almaımyn. Sebebi alýan túrli órt shyqty. 
Dıspetcher retindegi basty mindetim – oqıǵa ornyna kúshter men quraldardy baǵyttaý, jedel járdem men ózge de qajetti shuǵyl qyzmetterdiń sol jerge ýaqtyly jetýin uıymdastyrý. Bul - jaýapkershiligi zor, júgi aýyr jumys.

- Hobbıińiz qandaı?

- Bizde bos ýaqyt az. Biraq soǵan qaramastan, qolym qalt etse balalarmen velosıped tepkendi unatamyn. Jańa retseptterdi úırenip, dámdi tamaq pisiremin. Ulym únemi menen bir aspazdyq shedevr kútip júredi. Shamam kelgenshe ony tańǵaldyrýǵa tyrysamyn. Odan keıin kitap oqyǵandy jaqsy kóremin. 

- Kitap oqýǵa da ýaqyt tabatynyńyz ózgege úlgi bolarlyq eken. Qandaı kitaptardy jıi oqısyz?

- Ártúrli. Ózimdi damytatyn kitaptardy súıip oqımyn. Mundaı kitaptar daǵdylaryńyz ben oı-órisińizdi jetildirýge, maqsattaryńyzǵa jetý úshin shabyt pen motıvatsııa alýǵa kómektesedi. Til baılyǵyn arttyryp, durys sóıleý qabiletin jetildiretin kitaptardy da oqımyn. Oqyǵan sońǵy shyǵarmam – «Zýleıha kózin ashady». Avtory – Gýzel ıAhına. Kitap oqý arqyly stressti de azaıtýǵa bolady.

- Áńgimeńizge kóp rahmet!