Telefon alaıaqtyǵyna qarsy jańa tetikter qashan kúshine enedi
ASTANA. KAZINFORM — Telefon arqyly jasalatyn alaıaqtyqtyń jańa túri kóbeıgen saıyn azamattardy qorǵaýǵa baǵyttalǵan zańnamalyq ózgerister kúsheıtilip jatyr.
Bul týraly Іshki ister mınıstrligi Kıberqylmysqa qarsy is-qımyl departamenti basqarmasynyń bastyǵy Beıbit Birjanov Jibek Joly telearnasynyń «Búgin Live» baǵdarlamasynda aıtty.
Onyń sózinshe, aldaǵy ózgeristerdiń biri – resmı uıymdardyń qońyraýyn sáıkestendirý júıesi. Endi bankterden, memlekettik organdardan jáne ózge de resmı mekemelerden qońyraý shalynsa, telefon ekranynda uıymnyń ataýy kórsetiledi.
– Jańashyldyq azamattarǵa qońyraýdyń qaı uıymnan túskenin birden anyqtaýǵa múmkindik berip, alaıaqtardyń jalǵan qońyraý shalý qaýpin azaıtady, – dedi spıker.
Atalǵan ózgerister kelesi aıdyń sońynda kúshine enedi.
Mamannyń aıtýynsha, azamattardyń tsıfrlyq saýattylyǵyn arttyrý da mańyzdy. Óıtkeni alaıaqtar adamdy aldaýdyń jańa tásilderin únemi oılap tabady.
Zańnamalyq túzetýler tek alaıaqtyqpen kúresýdi emes, telekommýnıkatsııa salasyn retteýdi de qamtıdy. Atap aıtqanda, ınternetke qol jetkizý, IP-telefonııa jáne trankıngtik baılanys qyzmetteri lıtsenzııalanatyn bolady. Bul baılanys qyzmetteri naryǵyndaǵy baqylaýdy kúsheıtip, zańsyz qyzmet kórsetý táýekelderin tómendetýge múmkindik beredi.
Sonymen qatar uıaly baılanys operatorlary usynatyn aqyly qyzmetterge qoıylatyn talaptar qatańdamaq. Buryn abonentter bir túımeni qate basyp, aqyly jazylymǵa avtomatty túrde qosylyp ketetin. Endi operatorlar mundaı qyzmetterdi tek paıdalanýshy SMS-habarlama nemese telefon qońyraýy arqyly naqty kelisimin rastaǵannan keıin ǵana qosa alady.
Eske salaıyq, Ulttyq antıfrod ortalyǵy 68 mlrd teńge kólemindegi alaıaqtyqtyń aldyn aldy.
