Telefon alaıaqtyǵyna qarsy qandaı jumystar júrgizilip jatyr – mınıstr jaýaby

ASTANA. KAZINFORM – Úkimet otyrysynda elimizde telefon alaıaqtyǵyna qarsy qandaı is-sharalar atqarylyp jatqany aıtyldy.

— Onlaın alaıaqtyqqa qarsy is-qımylǵa barlyq múddeli memlekettik jáne quqyq qorǵaý organdary tartyldy. Mınıstrlik tarapynan birqatar shara qabyldandy. Málimetterge qoljetimdilikti baqylaıtyn servıs iske qosyldy. Osy servıske memlekettik aqparattyq júıeniń 70 paıyzdan astamy qosyldy. Ol jeke derekterge qol jetkizý kelisimderin jınap, habarlama beredi. Kıberqaýipsizdik salasyndaǵy kompanııalarmen birigip citizensec.kz jáne nomadguard.kz ınternet resýrstary iske qosyldy. Bular azamattardy habarlandyrýdy arttyrýǵa baǵyttalǵan, - dedi QR tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev.

Spıker sondaı-aq baılanys operatorlarynyń jumysy úılestirilip jatqanyn atap ótti.

— Alaıaqtyq qońyraýlardy anyqtap, buǵattaýǵa arnalǵan antıfrod ortalyqtar quryldy. Olar Ulttyq banktiń antıfrod ortalyqtarymen biriktirilgen, - dedi ol.

Osyǵan deıin polıtsııa alaıaqtyq qońyraýlardyń aldyn alý baǵytynda 24 myńnan astam sim-karta tárkilegeni týraly jazdyq.