Teledebat: Saıası partııalar qoǵamnyń qandaı problemalaryn sheshýdi kózdep otyr
Teledebatta sóz bastaǵan «Aýyl» partııasynyń múshesi Dáýletkereı Kápuly áleýmettik nemese ekonomıkalyq máselelerdi emes, eń aldymen ıdeologııanyń qalaı bolatynyn aıqyndap alý kerektigin atap ótti. Onyń aıtýynsha, ulttyq ıdeologııa durys jolǵa qoıylmaı, elimizdiń damý strategııasy júzege asyrylmaıdy. Jalpy «Aýyl» partııasy ulttyq ıdeologııanyń tujyrymdamasyn daıyndap qoıǵan. Ol tujyrymdamany zııaly qaýym ókilderi, ult janashyrlary talqylap, daıyn qujat Parlamentke joldanbaq. Sonymen qatar «Aýyl» partııasy jerdi satýdy jáne sheteldikterge jalǵa berýdi túbirimen toqtatyp, muny zańmen shegeleýdi josparlaýda.
Al ekinshi bolyp sóz alǵan «Nur Otan» partııasynyń ókili Aıdos Sarymnyń atap ótýinshe, qazir el qıyn-qystaý kezeńde, Qazaqstan úlken reformalar aldynda tur. Elimizdi, álemdi pandemııa jaılap jatyr. Osynyń bárin eskere kele, árbir esti ári oıly azamat eliniń bolashaǵyn, memlekettiń turaqtylyǵyn oılaýy kerek. «Nur Otan» partııasynyń múshesi tarıh bizge taǵy ýaqyt bere me degen úlken másele baryn aıtady. Sózinshe, halyq qazir kóptegen máselege narazy bolýy yqtımal. Biraq aınalyp kelgende el de, memleket te - bireý. Aıdos Sarymnyń paıymdaýynsha, muny elimizdiń eshbir azamaty esten shyǵarmaýy kerek. Urpaqtyń basty mindeti – ózimizden keıingi býynǵa babadan qalǵan jerdi amanattaý, táýelsiz memlekettiń tizginin berý.
Osydan keıin «Aq jol» partııasynyń atynan Berik Dúısenbınov sóıledi. Onyń sózinshe, «Aq jol» partııasynyń maqsaty Alash ıdeıasymen úndes. Partııa múshesi ult kósemi Álıhan Bókeıhannyń «Memlekettigi joq ult jetim» degen sózin mysalǵa keltirdi. Sondyqtan «Aq jol» partııasynyń músheleri táýelsizdikti basty baılyq dep tanyp, qazaq jeriniń árbir tasy ár qazaqtyń keýdesine túıme bolyp qadalýy kerektigin jumysynyń basty baǵdary etpek. Berik Dúısenbınovtiń sózinshe, qazaq basqa elderden kem bolmaýy úshin bilimdi, baı ári myqty bolýy tıis. Partııanyń ókili sonymen qatar ekonomıkalyq táýelsizdikke qol jetkizý – basty mindetterdiń biri ekenin aıtyp ótti. Budan bólek «Aq jol» partııasy ekonomıkany nyǵaıtý úshin birqatar shara usynbaq.
Qazaqstan halyq partııasy atynan teledebatqa Ǵazız Qulahmetov qatysty. Onyń sózinshe QHP – halyq problemalaryn, jer máselesin, qoǵamdyq ótkir máselelerdi jıi qozǵap júrgen saıası partııa. Partııa ókili óz jaqtastarynyń ıdeıalarynyń negizinde qarapaıym bastamalar jatqanyn baıan etti. Onyń aıtýynsha, QHP halyqtyń bilimi men densaýlyǵy, baspana muqtajdyǵy, azyq-túlik qaýipsizdigi, zeınetkerlik jasty 60 jasqa (erlerdiń) deıin tómendetý, lokdaýnnan zardap shekken kásipkerlerge birrettik nesıe raqymshylyǵyn jasaý, jer baılyǵyn berekesiz paıdalanýdy toqtatý, memlekettik apparatty reformalaý, halyqtyń rýhanı murasyn jańǵyrtý bastamalaryn qolǵa alady. Osylaısha, Qazaqstan halyq partııasy osy baǵdarlamada kórsetilgen barlyq bastamany bar kúsh-jigerimen oryndaýdy kózdeıdi.
Partııa ókilderiniń ishinde sońǵy bolyp sóz alǵan «Adal» partııasynyń múshesi Maqsat Tolyqbaı birinshi kezekte Medıtsınalyq áleýmettik qordy tarqatý kerektigin jetkizdi. Onyń aıtýynsha, bul elde medıtsına tegin bolýy tıis. Sonymen qatar «Adal» partııasynyń músheleri memlekettik qyzmetkerlerdiń ortasha jalaqysyn keminde 200 myń teńgege kóterýdi, stýdentterdiń shákirtaqysyn eń tómengi jalaqymen teńestirýdi, al eń tómengi jalaqynyń shegin 60 myń teńgege jetkizýdi kózdeýde. Sonymen qatar Maqsat Tolyqbaı aýyldaǵy jastardyń jumyssyz júrgeni – úlken problema ekenin atap ótti. Partııa kásipkerlerge arnalǵan nesıeni 6 paıyzǵa deıin túsirip, ony kepilsiz qylýdy másele etip kóterýde. Odan bólek Maqsat Tolyqbaı aýylda jer kóp bolǵanymen, mal jaıatyn jer joqtyǵyn da ózekti problema dep atady. Sol úshin «Adal» partııasynyń músheleri jerdi bólý máselesin tsıfrlyq formatqa aýystyrý kerek dep sanaıdy.
