Telearnalarda kórsetilip jatqan sheteldik fılmderdiń bári birdeı kásibı deńgeıde dýblıajdalyp jatqan joq - akter pikiri
ALMATY. 20 naýryz. QazAqparat - Telearnalarda kórsetilip júrgen aýdarma fılmderdiń bári birdeı kórermen júreginen jol taýyp jatqan joq.
Bul Almatyda «Kokteıl» komedııalyq melodramasynyń Qazaqstandaǵy prokatyna oraı jýrnalısterge uıymdastyrylǵan alǵashqy kórsetilim kezinde aıtyldy.
«Qazir otandyq telearnalarda sheteldik fılmder kóp kórsetiledi. Alaıda olardyń bári birdeı kásibı deńgeıde dýblıajdalyp jatqan joq. Aqsha únemdeımiz dep keıde bir akterge birneshe keıipkerdi dybystatyp jatady. Qysqa ýaqyttyń ishinde olardyń báriniń jan-dúnıesine ený múmkin emes. Mundaı jaǵdaı meniń de basymnan ótti», - deıdi Natalıa Sats atyndaǵy balalar men jasóspirimder teatrynyń akteri Ilıas Týmanov.
Komedııalyq rólderdi dýblıajdaýdy unatatyn onyń aıtýynsha, Homı Adadjanıanyń «Kokteıl» komedııalyq melodramasy oń jambasyna kelgen. «Dýblıaj janrynda nemquraıly kózqaras bolmaýy kerek. Onda árbir dybys úlken ról atqarady. Sondyqtan dýblıajdy uıymdastyrýshylar oǵan kásibı akterlerdi kóbirek tartýǵa mán berýi tıis. Rejısserlerdiń keıipkerlerdi somdaýshylardyń daýysyn ekinshi bir akterge qaıta dybystatýy kıno salasynda jıi kezdesetin jaǵdaı. Óz týyndysynyń ómirine nemquraıdy qaramaıtyn árbir túsirýshi ony dýblıajdaýshylardy baıqaý arqyly iriktep alady. Sondyqtan oǵan telearna basshylary tarapynan da erekshe kózqaras kerek»,-deıdi I. Týmanov.
