«Telearnalarda qazaqy ıisi ańqyp turǵan dúnıeler birli-jarym» - respýblıkalyq basylymdarǵa sholý
***
Keshe Qazaqstan Respýblıkasy Parlamenti Senatynyń Tóraǵasy Qaırat Mámı Sankt-Peterbýrg qalasyndaǵy Tavrııa saraıynda ótken EýrAzEQ Parlamentaralyq Assambleıasynyń on úshinshi otyrysyna qatysyp, onda EýrAzEQ PAA-nyń tóraǵalyǵyna saılandy. Osyǵan oraı «Egemen Qazaqstan» gazetinde «Mereıtoılyq otyrys elimizde ótedi» degen taqyryppen maqala jaryq kórdi. Basylymnyń atap ótýinshe, otyrysta Eýrazııalyq ekonomıkalyq qoǵamdastyq Sotynyń sýdıalary taǵaıyndaldy. Aldaǵy jyldyń 1 qańtarynan bastap jumysyn bastaıtyn jańa sot organyna Qazaqstan tarapynan Musabek Álimbekov pen Jolymbet Báıishev qyzmetke baratyn boldy.
«Egemen Qazaqstan» gazetiniń jazýynsha, keshe Bas prokýror Ashat Daýylbaevtyń tóraǵalyq etýimen aǵymdaǵy jyldyń jumys qorytyndylaryn jáne aldaǵy kezeńdegi qyzmettiń basym baǵyttaryn qarap, talqylaǵan Bas prokýratýranyń keńeıtilgen alqa májilisi boldy. Onyń jumysyna beınekonferentsııalyq baılanys arqyly oblys prokýrorlary jáne olarǵa teńestirilgen prokýrorlar, oblystyq, qalalyq jáne aýdandyq deńgeıdegi prokýratýralardyń qyzmetkerleri qatysty. Alqa jumysynyń qorytyndysy boıynsha Bas prokýror azamattardyń, kámeletke jasy tolmaǵandardyń konstıtýtsııalyq quqyqtaryn qamtamasyz etý, kásipkerlikti qorǵaý, uıymdasqan qylmyspen, sybaılas jemqorlyqpen, ekstremızm jáne terrorızmmen kúres tárizdi prokýrorlyq qadaǵalaýdyń basym baǵyttary boıynsha birqatar tapsyrmalar berdi.
***
Osydan on shaqty jyl buryn uıaly telefon biz úshin tańsyq edi. Búginde eresekter bylaı tursyn, kishkentaı búldirshinderdiń qolynda qos telefonnan bar. Álem ǵalymdary uıaly telefonnyń adam aǵzasyna tıgizer keri áseri týraly jıi aıtady. Alaıda qulaq túrip, elep jatqan eshkim joq. Qaıta zaman aǵymyna saı uıaly telefonnyń túr-túri jurttyń nazaryn baýrap júr. Ásirese, túrli oıyndary men ǵalamtorǵa shyǵý múmkindigi bar telefondar jas urpaqtyń súıikti «oıynshyǵyna» aınaldy. Mamandar aldaǵy 10-15 jylda symsyz telefonnyń áleginen isik dertine shaldyǵýshylardyń sany arta túsetinin aıtyp dabyl qaǵýda. Bul jaıynda tereńirek bilgińiz kelse, «Aıqyn» gazetiniń senbilik sanyndaǵy «Qaltaly telefon qaýipti» degen taqyryptaǵy maqalaǵa nazar aýdaryńyz.
«Alash aınasy» gazetiniń turaqty «Dat!» aıdarynda ánshi-jyrshy Aqan Ábýálımen aradaǵy suhbat «Telearnalarda qazaqy ıisi ańqyp turǵan dúnıeler birli-jarym» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Otandyq BAQ-tar tarıhtan tam-tum retinde, ertede ómir súrgen jáne búginde kózi tiri belgili jandar jaıynda azdaǵan dúnıeler jasap turýdy turaqty aıdarlaryna aınaldyrsa eken deımin. Solardyń ómirbaıanyn, sińirgen eńbegin qazirgi urpaqtarǵa jetkizip otyrsa, jarqyn jandardyń esimderi óshpes edi. Ári ıgi jandardyń júrip ótken ómir ótkelderi - jas býynǵa tárbıe. Ol ónerden bolsyn meıli, ádebıetten bolsyn meıli, áıteýir, kez kelgen saladan», - deıdi.
***
«Keshe Memleket basshysy Nursultan Nazarbaev Memlekettik qyzmet isteri agenttiginiń tóraǵasy Álıhan Baımenovti qabyldady», dep jazady «Kazahstanskaıa pravda» gazeti. Á. Baımenov Prezıdentke Agenttik pen onyń aýmaqtyq basqarmalarynyń 2011 jyly atqarǵan jumys nátıjeleri, agenttiktiń jumysyn jetildirý jóninde josparlanǵan sharalar, Qazaqstan Respýblıkasynyń memlekettik qyzmetke qatysty zańnamasyna engiziletin ózgerister men tolyqtyrýlar jáne memlekettik qyzmettiń jańa modeliniń tujyrymdamasyn iske asyrý sheńberindegi basqa máseleler, sondaı-aq Qazaqstanda memlekettik qyzmetti odan ári reformalaý máselesinde halyqaralyq yntymaqtastyq týraly habarlady.
