«Telearnalar nege Naýryzdan góri, jańa jyldy qurmetteıdi?»-respýblıkalyq basylymdarǵa sholý
***
«Aıqyn» gazetiniń jazýynsha, QR Prezıdenti laýazymynan úmitker Mels Eleýsizov pen Ǵanı Qasymov Almaty men Astana qalalarynda jáne oblys ortalyqtarynda saılaýaldy úgit-nasıhat jumystaryn júrgizý úshin Ortalyq saılaý komıssııasynan kómek surady. Osy máselege oraı óz jaýabyn bergen OSK tóraǵasy Qýandyq Turǵanqulov: «Biz máseleni sheshe alamyz degen oıdamyn. Taıaýda Astana men Almatyda jáne birqatar oblys ortalyqtarynda atalmysh kandıdattardyń jańa bılbordtary men jarnamalary boı kóterip qalar», - depti. Maqala «Qos úmitker kómek surady» degen taqyryppen berilgen.
«Buny da keńestik zamannan qalǵan ádet dersiz, biraq kúni búginge deıin otandyq telearnalarda Ulystyń uly kúni - Naýryzdyń nasıhattalýy, 31 jeltoqsanda toılanatyn jańa jyldan asa almaı keledi», - dep jazady «Aıqyn» gazeti. Rasynda da Jańa jylǵa bizdiń telearnalar Reseıdiń elektrondy BAQ-tarymen jarysyp, árqıly qyzyqty baǵdarlamalar, tok-shoýlar, tipti ózindik qysqa fılmder túsirýge de tyrysyp baǵady. Al Naýryzdy nasıhattaý maqsatynda túsirilgen azdy-kópti baǵdarlamalar bıýdjetiniń qandaı bolǵanyn olardyń sapasynan-aq baıqaý qıyn emes. Bul jaıynda basylymnyń búgingi sanyndaǵy «Telearnalar nege Naýryzdan góri, jańa jyldy qurmetteıdi?» degen maqalada keńinen baıandalǵan.
***
«Alash aınasy» gazetiniń jazýynsha, Májilistiń keshegi jalpy otyrysynda depýtat Ýálıhan Qalıjan Memlekettik hatshy-Syrtqy ister mınıstri Qanat Saýdabaevtyń atyna úndeý jasady. Onda májilismen Ulystyń uly kúnin toılaýdyń aýqymyn da, mazmunyn da keńeıtý qajettigin aıtqan. «Memleket hatshysynan arnaıy komıssııa quryp, naýryz meıramyn toılaýdyń birtekti josparyn jasaýdy suraımyn», - depti ol. Osy jáne halyq qalaýlylarynyń jalpy otyrysynda kóterilgen ózge de jaıttarmen etene tanysqyńyz kelse, basylymdaǵy «Depýtattar Naýryz meıramynyń «selt etkizerin» izdep álek» degen maqalaǵa nazar salyńyz.
Osy basylymnyń turaqty «Dat!» aıdarynda bıologııa ǵylymynyń doktory, professor, QR UǴA akademıgi Murat Ǵylmanovpen aradaǵy suhbat «Qazaqstanda arnaıy ónertapqyshtar qoǵamyn qurý kerek» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol: «Qoǵamdy, sonyń ishinde ǵylymdy indet jaılap bara jatsa, bul, birinshiden, memlekettik baqylaýdyń tómendiginen. Ekinshiden, bizdegi laýazymdy tulǵalarda qyzmetke degen jaýapkershilik az. Úshinshiden, mamandardy tańdaý kezinde bizde sýbektıvızm basymdyq tanytady», - deıdi.
***
Beıresmı statıstıkalyq derekterge sáıkes 500 myńnan astam qazaq ártúrli dinı sektalar qataryn tolyqtyrypty. Osy másele «Nur Astana» gazetiniń beısenbilik nómirindegi «Sekta sansyz, qazaq jalǵyz» taqyrybyndaǵy maqalada kóterilgen. «Elimizde bar-joǵy 8 myńǵa jýyq armıan bar eken. Alaıda, olardyń 50 shirkeýi bar degendi estigende, amalsyz jaǵańdy ustaısyń. Eń masqarasy, álgi shirkeýlerde dinı qyzmetti ózimizdiń qazaqtar atqarady eken. Al kerek bolsa. Dinı platsdarm degen osy shyǵar, bálkim», - dep jazady basylym.
***
«Keshe QR Memlekettik hatshysy - Syrtqy ister mınıstri Qanat Saýdabaev BUU Bas hatshysynyń arnaıy ókili, Ortalyq Azııadaǵy preventıvti dıplomatııa jónindegi BUU Aımaqtyq Ortalyǵynyń basshysy Mıroslava Enchany qabyldady», - dep jazady «Kazahstanskaıa pravda» gazeti. Basylymnyń atap ótýinshe, kezdesý barysynda Ortalyq Azııadaǵy sý-energetıkalyq resýrstardy basqarý, zańsyz kóshi-qon, esirtki trafıgi jáne transshekaralyq qylmys, ekstremızm men terrorızmge qarsy kúresti qamtıtyn yntymaqtastyq máseleleriniń keń aýqymy, sondaı-aq aýǵan problematıkasymen qosa, aımaqtaǵy ahýal talqylandy.
