Telearnalar kórsetilimin qadaǵalaıtyn qoǵamdyq komıssııa qurý kerek - S. Tursynov
ASTANA. Qazannyń 13-i. QazAqparat /Qanat Mámetqazyuly/ - Balalar men jastar tárbıesin jaqsartý maqsatynda elimizdegi telearnalar kórsetilimin qadaǵalaıtyn qoǵamdyq komıssııa qurý qajet. Búgin QR Parlamenti Májilisiniń jalpy otyrysynda QR Baılanys jáne aqparat mınıstri Asqar Jumaǵalıevke jáne QR Bas Prokýrory Qaırat Mámıge saýal joldaǵan depýtat Saǵynbek Tursynov osylaı málim etti.
«Qoǵamdyq sanany qalyptastyrýda, bala tárbıesinde buqaralyq aqparat quraldarynyń, onyń ishinde telearnalardyń alar orny erekshe. Balalardyń kúndelikti ýaqytynyń qansha saǵatyn teledıdar aldynda ótkizetinin aıtpasa da túsinikti. Sondyqtan telearnalarda kórsetiletin túsirilimderdiń sapasy men mazmunyna asa mán berilýi qajet dep oılaımyn»,- dedi depýtat.
Onyń aıtýynsha, elimizdegi telearnalar qoldanystaǵy zańnamany óreskel buzyp, urpaq tárbıesine kereǵar dúnıelerdi kórsetýden taımaı keledi. «Buqaralyq aqparat quraldary týraly» zańda «pornografııalyq jáne arnaýly seksýaldyq-erotıkalyq sıpattaǵy radıo, teledıdar baǵdarlamalarynyń efırge shyǵarylýyna, sondaı-aq kıno jáne beıne óniminiń kórsetilýine, qatigezdik pen zorlyqty nasıhattaýǵa tyıym salynady»,-dep jazylǵan. Soǵan qaramastan qaı arnany alyp qarasańyz da atys-shabys, qantógis nemese erotıkalyq sıpattaǵy shet eldik fılmder men baǵdarlamalar, klıpter udaıy kórsetiledi. Budan bólek, zań arqyly temeki men ishimdikterdi jarnamalaýǵa tyıym salynǵan. Alaıda retranslıatsııalanatyn reseılik arnalardaǵy syra nemese basqa ishimdikterdiń jarnamasy bizdiń efırde úzdiksiz kórsetilýde. Bul Qazaqstannyń zańnamalaryna qaıshy. Sondyqtan atalǵan zańnyń oryndalýyn qamtamasyz etý men balalar men jastar tárbıesin jaqsartý maqsatynda telearnalar kórsetilimin qadaǵalaıtyn qoǵamdyq komıssııa qurý qajet dep bilemin», - dedi S. Tursynov.
