Telearnalar býkmekerlerdi jarnamalaýǵa quqyly - mınıstrlik
ASTANA. KAZINFORM - Týrızm jáne sport mınıstrligi býkmekerlik keńselerdi jarnamalaý tártibi týraly aqparat taratty.
«Elimizdegi sport telearnalaryn qospaǵanda, kınoteatrlarda, anyqtama kitaptarynda jáne jalpy BAQ-ta býkmekerlik keńselerdi jarnamalaýǵa tyıym salynady. «Habar» jáne Qazaqstan sııaqty jalpy mazmundaǵy telearnalar halyqaralyq sporttyq is-sharalardyń tikeleı kórsetilimderi kezinde ǵana býkmekerlik keńselerdi jarnamalaýǵa quqyly. Býkmekerlerdi jarnamalaýǵa tek sport taqyrybyna arnalǵan jáne zań boıynsha tirkelgen sport telearnalary men BAQ-qa ruqsat etiledi. Býkmekerlerdiń jarnamasy jalpy mazmundaǵy telearnalarda tek halyqaralyq sporttyq jarystardyń tikeleı translıatsııalary kezinde ǵana ruqsat etiledi. Translıatsııaǵa deıin jáne keıin jarnamalaýǵa tyıym salynady. Býkmekerlerdiń logotıpteri men saýda belgileri sportshylardyń sporttyq kıimderi men sporttyq qural-jabdyqtarynda ornalastyrylýy múmkin», - delingen mınıstrlik habarlamasynda.
Býkmekerlik keńselerdiń taýar belgilerin zańnama saqtalǵan jaǵdaıda sporttyq týrnırlerdiń, obektiler men jobalardyń resmı ataýlaryna engizýge ruqsat etiledi.
Eske salsaq, Qazaqstanda býkmekerlik keńseler men totalızatorlar jarnamasyna jańa shekteýler men aıyppuldar kúshine engeni týraly habarlaaǵan bolatynbyz.
