Telagraph: saýalnamaǵa qatysqan brıtandyqtardyń 90 paıyzy Palestınany moıyndaýǵa qarsy
ASTANA. KAZINFORM – Brıtandyqtardyń 90 paıyzy Londonnyń Palestınany moıyndaý týraly bastamasyn qoldamaıdy. Bul týraly JL Partners kompanııasy júrgizgen áleýmettik zertteýine silteme jasap The Daily Telegraph basylymy habarlady, dep jazady reseılik TASS.
19–31 tamyz aralyǵynda 2 118 adam arasynda qoǵamdyq pikirge saýalnama júrgizildi. Nátıjesinde respondentterdiń 87% Palestına memleketin eshqandaı shartsyz moıyndaýǵa qarsy ekenin bildirgen. Qoldaýshylar 13% ǵana. Bılik basyndaǵy Leıborıstik partııa jaqtastary arasynda bul sheshimdi qoldaǵandar 11% bolsa, oppozıtsııalyq Konservatıvtik partııa (6%) men ońshyl-popýlıstik Reform UK partııasy (8%) arasynda qoldaý deńgeıi odan da tómen.
Saýalnama qorytyndysyna sáıkes, oǵan qatysqandardyń 51%-y HAMAS qozǵalysy bılik basynda turǵanda Palestınany moıyndaýǵa bolmaıdy. Al 40%-y Palestınany moıyndaý úshin HAMAS-tyń atysty toqtatýy jáne ızraıldik tutqyndardy bosatýy shart bolýy tıis dep esepteıdi. Sonymen qatar, 17% respondent Palestına memleketin moıyndaýǵa múldem qarsy.
BBC korporatsııasy men Sky News telearnasynyń habarlaýynsha, Ulybrıtanııa premer-mınıstri Kır Starmer 21 qyrkúıekte Palestınanyń memlekettiligin moıyndaıtynyn jarııalaıdy. Bul sheshimge syn aıtýshylardyń pikirinshe, mundaı qadam Londonnyń Izraılge de, HAMAS-qa da yqpal etý múmkindigin shekteıdi.
10 Daýnıng-strıttegi premer-mınıstr keńsesi 29 shildede, eger Izraıl Gaza sektoryna gýmanıtarlyq kómektiń jetkizilýine kedergi keltirýin jáne anklavtaǵy áskerı operatsııasyn toqtatpasa, BUU Bas Assambleıasynyń qyrkúıektegi sessııasy bastalǵanǵa deıin Palestınany moıyndaıtynyn eskertken. Gazadaǵy áskerı qımyldardyń kúsheıýine baılanysty keıin Ulybrıtanııa Syrtqy ister mınıstrligi de qyrkúıekte Palestınany tanýǵa nıetti ekenin rastady.
BUU Bas Assambleıasynyń joǵary deńgeıdegi aptalyǵy aıasyndaǵy jalpy saıası pikirtalastar 23–27 qyrkúıek aralyǵynda, sondaı-aq 29 qyrkúıekte ótedi.
Osyǵan deıin BUU konferentsııasynda 10 memleket Palestınany moıyndaǵaly otyrǵany týraly jazdyq.