Tel-Avıvtegi Eýroodaq delegatsııasy ornalasqan aýdanǵa zymyran qulady

ASTANA. KAZINFORM - Kazinform agenttiginiń menshikti tilshisi habarlaǵandaı, Eýropalyq buqaralyq aqparat quraldarynyń birneshe derekkózi Tel-Avıvte ornalasqan Eýropalyq odaq delegatsııasy ornalasqan aýdanǵa zymyran túskenin málimdedi.

Eýropalyq dıplomatııalyq mıssııa qyzmetkerleri aman qalǵany habarlandy.

— Búgin EO qyzmetkerleriniń eshqaısysy zardap shekpegenimen, Iran tarapynan jasalǵan shabýyldar saldarynan Eýroodaqtyń dıplomatııalyq ǵımarattarynyń zaqymdanýyna alańdaýshylyq bildiremiz. Azamattyq aýdandar, sondaı-aq sheteldik dıplomatııalyq qyzmetkerler men mıssııalar qandaı jaǵdaı bolmasyn shabýyl nysanyna aınalmaýy tıis, — dedi Eýrokomıssııa ókili.

Aıta keteıik, Izraıl men Iran arasyndaǵy áskerı qaqtyǵystardyń jetinshi kúni ózara shabýyldarmen jalǵasýda. Atap aıtqanda, Izraıldegi aýrýhana men Irannyń Arak qalasyndaǵy aýyrsýly reaktorǵa soqqy berilgeni jóninde habarlandy. Bul oqıǵalar aıasynda AQSh-tyń soǵysqa aralasýy múmkin degen qaýipter aıtylyp, eki elden de dıplomattar men sheteldik azamattar evakýatsııalanyp jatyr.

Eske salaıyq, QR Syrtqy ister mınıstrligi Iran men Izraılde júrgen azamattaryna eskertý jasady.