Tel-Avıvte 80 myń adam sot júıesin qaıta qaraýǵa qarsy sherýge shyqty

AMMAN. QazAqparat - Senbi kúni keshke Tel-Avıvtegi Habıma alańyna on myńdaǵan sherýshiler premer-mınıstr Bınıamın Netanıahýdyń jańa úkimetine jáne onyń Izraıldiń ádilet júıesin ózgertý josparyna narazylyq bildirý úshin shyqty, dep habarlaıdy QazAqparat tilshisi The Times of Israel basylymyna silteme jasap.

Polıtsııanyń málimetinshe, alań men onyń mańyndaǵy kóshelerge 80 myńǵa jýyq adam jınaldy, olardyń kópshiligi Tel-Avıvke eldiń túkpir-túkpirinen jalǵa alynǵan avtobýstarmen kelgen. Sherýler Ierýsalım men Haıfada da ótti.

Polıtsııanyń eskertýine jáne Ulttyq qaýipsizdik mınıstri Itamar Ben-Gvırdiń tártipsizdikterdi joıýǵa shaqyrǵanyna qaramastan, demonstranttar men saqshylar arasyndaǵy birneshe qaqtyǵystardy aıtpaǵanda, jalpy narazylyq beıbit túrde aıaqtaldy. Narazylyq bildirýshilerdiń qoldarynda «Qylmystyq úkimet», «Demokratııanyń aıaqtalýy» jáne basqa da urandar jazylǵan Izraıl jalaýlary men transparanttar bar.

Benıamın Netanıahý bastaǵan Izraıldiń jańa úkimeti eki aptadan astam ýaqyt boıy bılikte. Saıasatker eldiń zań júıesin qaıta qaraýdy kún tártibindegi basty másele etip qoıdy. Bul qadam, belsendlerdiń pikirinshe, eldegi tejeý ​​men tepe-teńdiktiń demokratııalyq júıesin joıady.

Ádilet mınıstri ıArıv Levın buǵan deıin sot júıesin qaıta qaraýdy usynǵan bolatyn. Jańa bastama Izraıldiń Joǵarǵy sotynyń sot baqylaýyna jáne sýdıalardy taǵaıyndaýǵa saıası baqylaýdy shoǵyrlandyrýǵa arnalǵan ókilettikterin shekteıdi.

Levınniń pikirinshe, sottar shekten tys ókilettikterge ıe bolyp, saılaýshylardyń erkine qarsy sheshimder qabyldaıdy.

Al bılik josparyna qarsylar usynylǵan ózgerister ızraıldik demokratııaǵa nuqsan keltiredi dep málimdeıdi. Izraıl oppozıtsııasynyń jetekshileri, burynǵy bas prokýrorlar jáne Izraıldiń Joǵarǵy soty bul josparǵa qarsy.

Netanıahý jumada: «Biz muny saılaý aldynda talqyladyq jáne buny jasaýǵa jurtshylyqtan naqty mandat aldyq. Men barlyǵyna sabyrǵa kelip, mazmundy pikirtalasqa kirisýdi usynamyn», - dedi.

Aıta keteıik, Netanıahýdyń ózi 2016 jyldan beri sot tergeýinde boldy, oǵan áli de sybaılas jemqorlyq jáne qyzmettik ókilettigin asyra paıdalandy degen aıyp taǵylyp otyr.

Endi sot júıesindegi ózgerister Netanıahýǵa sottalýdan qutylýǵa nemese tipti onyń sot protsesin tolyǵymen joıýǵa kómektesýi múmkin. 2019 jyly aıyp taǵylǵan soń, Netanıahý sot tóreligi oǵan birjaqty qarsy ekenin aıtty.

Narazylyq aktsııasyna qatysqandardyń arasynda Izraıldiń ártúrli partııalarynyń, onyń ishinde oppozıtsııanyń burynǵy jetekshileri de bar.