Tel-Avıvte 100 myńnan astam adam narazylyq aktsııasyna shyqty
TELЬ-AVIV. QazAqparat – Tel-Avıv pen Izraıldiń basqa qalalarynda júz myńnan astam adam narazylyq aktsııasyna shyqty. Olar Bınıamın Netanıahý úkimetine jáne onyń joǵarǵy sottyń ókilettikterin shekteýdi kózdeıtin reformasyna qarsy, dep habarlaıdy QazAqparat tilshisi The Times of israel basylymyna silteme jasap.
Jergilikti polıtsııa Tel-Avıvtiń Kaplan kóshesi men Habım alańyna shamamen 110 myń adam jınalǵanyn habarlady. Tel-Avıvtiń ortalyǵyndaǵy kóptegen joldar jabyldy jáne tártipti qamtamasyz et úshin polıtsııa kúshteri tartyldy.
Eldiń barlyq qalalarynda, sonyń ishinde Ierýsalım, Haıfa, Beer-Sheve, Gertslııa men Modıınde myńdaǵan adam mıtıngige shyqty. Sondaı-aq, shetelde turatyn ızraıldikter Boston, Barselona jáne Toronto qalalarynda kóshege shyqqan.
Ereýilge shyqqandar Bınıamın Netanıahý úkimeti bastaǵan sot reformasyna narazylyq bildiredi. Buǵan deıin Ádilet mınıstri ıArıv Levın Izraıl sot júıesin aıtarlyqtaı álsiretýi múmkin usynystar jasaǵan bolatyn. Joǵarǵy sottyń ókilettikteri úkimet pen zań shyǵarýshy bıliktiń paıdasyna ózgertilmek, sonymen qatar mınıstrler kabıneti sýdıalardyń taǵaıyndalýyn saıası baqylaýǵa alady.
Izraıldiń «12 kanal» arnasy B. Netanıahý koalıtsııasy zań jobasynyń 1 aqpanǵa deıin Knessette birinshi oqylymda qaralǵanyn qalaıtynyn habarlady.
Narazylyqqa opozıtsııa kóshbasshysy, burynǵy premer-mınıstr ıAır Lapıd qatysty. Sondaı-aq, burynǵy qorǵanys mınıstri jáne TsAHAL – Izraıl qorǵanys áskeriniń basshysy, «Ulttyq birlik» partııasynyń jetekshisi Benı Gants ta boldy.
Netanıahý narazylyqtarǵa jaýap retinde 2022 jylǵy qarashadaǵy saılaýda onyń úkimeti saılaýshylardan partııasynyń aýqymdy sot reformasyn júzege asyrý úshin mandat alǵanyn birneshe ret aıtty.
Foto: The Times of Israel
