Tel-Avıv áýejaıynda birde-bir Qazaqstan azamaty qalǵan joq

Air Astana kompanııasynyń marketıng jáne satý jónindegi vıtse-prezıdenti Adel Dáýletbek BAQ ókilderine Tel-Avıv-Almaty reısiniń qalaı oryndalǵany týraly aıtyp berdi, dep habarlaıdy Kazinform.

«Air Astana» kompanııasynyń marketıng jáne satý jónindegi vıtse-prezıdenti Adel Dáýletbektiń aıtýynsha, elge jetkizilgenderdiń basym bóligi Qazaqstan azamattary men olardyń týystary. 166 jolaýshynyń ekeýi — náreste.

«Ózderińiz biletindeı, bul eldegi jaǵdaı senbiden bastap kúrt nasharlady. Osyǵan baılanysty Air Astana reısterdi toqtatty. Búgin ǵana evakýatsııalyq ushýdy júzege asyrý múmkin boldy. Kompanııa basshylyǵy azamattarymyzdy evakýatsııalaý úshin sheshýshi sharalar qabyldady. Biz Tel-Avıv áýejaıynda birde-bir Qazaqstan azamatyn qaldyrmadyq, olardyń barlyǵyn alyp kettik. Biz bul eldegi jaǵdaıdy jiti baqylap otyrdyq. Bul óte shıelenisti jaǵdaı. Jasyratyny joq, qıyn qadam boldy, óıtkeni ol jerde is júzinde azamattyq reıster qalmady. Olardyń barlyǵy toqtatyldy. Sondyqtan osy reısti oryndaǵanymyzǵa qýanyshtymyz», - dedi ol.

Buǵan deıin 124 qazaqstandyq arnaıy repatrıatsııalyq reıspen elge jetkizilgeni týraly jazǵan edik.
Eske salaıyq, 7 qazan kúni palestınalyq HAMAS toby Izraılge shabýyl jasady.

Keın Gaza sektorynan atylǵan zymyrandardyń biri Tel-Avıvtegi Ben-Gýrıon halyqaralyq áýejaıynyń mańyna túskeni belgili boldy.