Tekserý komıssııasy astananyń bilim oshaqtaryndaǵy kemshilikterdi atady
NUR-SULTAN. QazAqparat – Elordanyń bilim berý nysandaryna júrgizilgen tekserýdiń qorytyndysy málim boldy, dep habarlaıdy QazAqparat tilshisi.
Bul týraly Nur-Sultan qalasy boıynsha tekserý komıssııasynyń tóraǵasy Imanjúsip Aqpombaev qalalyq máslıhatynyń bıýdjet, ekonomıka, ónerkásip jáne kásipkerlik máseleleri jónindegi turaqty komıssııasynyń otyrysynda aıtty.
«Elordalyq bilim berý nysandaryna bólingen qarajatty paıdalaný tıimdiliginiń memlekettik aýdıti mynadaı problemalar men kemshilikterdi kórsetti. Bilim berý oshaqtarynyń jelisin damytý jolynda jergilikti atqarýshy organdardyń qabyldap jatqan sharalary jetkiliksiz. Qurylymdyq bólimsheler arasynda ózara is-qımyldyń naqty tetigi joq», - dedi Imanjúsip Aqpombaev.
Onyń aıtýynsha, qujattamany ázirleý, ózgerister engizý kezinde aıtarlyqtaı zańsyzdyqtarǵa jol berilgen. Mysaly, tórt nysannyń smetalyq quny 440 mln teńgege asyryp kórsetilgen.
«Mektepterdi tehnıkalyq múmkindikteri tómen kompıýterlermen jabdyqtaý faktileri tirkeldi. Bilim berý mekemeleriniń bekitilgen tıptik jobalarynyń bolmaýy smetalyq qunnyń qymbattaýyna aıtarlyqtaı áser etýi múmkin»,-dedi tekserý komıssııasynyń tóraǵasy.
