Tekserý komıssııasy Almaty ákimdiginiń birneshe kemshiligin kórsetti

ALMATY. KAZINFORM – Almatyda qalalyq máslıhattyń kezekti XXX sessııasy ótti. Onda 2024 jylǵy Almaty qalasynyń bıýdjetin atqarý máseleleri talqylandy.

Almaty qalasy boıynsha Tekserý komıssııanyń tóraǵasy Altaı Berdiqulov 2024 jyly jergilikti bıýdjettiń oryndalýyn teksergen aýdıttiń qorytyndysyn usyndy. Ol jalpy bıýdjettiń oryndalýyna oń baǵa berdi. Birqatar júıelik kemshilikterdi de atap ótti. Olar:

- Qala bıýdjeti Almatynyń damý josparymen tolyq kólemde úılestirilmegen;

- Jekelegen kórsetkishter «adamdar úshin» qaǵıdasyna sáıkes kelmeıdi;

- Damý josparynda aýanyń sapasyn baǵalaýǵa arnalǵan eshqandaı kórsetkishter qarastyrylmaǵan.

- Biz 2026–2030 jyldarǵa kelesideı usynystar jasaımyz: halyqtyń ómir sapasyn, ál-aýqatyn jáne áleýmettik jaǵdaıyn jaqsartýǵa baǵyttalǵan kórsetkishterdi aıqyndaý jáne «adamdar úshin» qaǵıdasyn qamtamasyz etý. Sonymen qatar azamattardyń keri baılanysyn eskere otyryp qalanyń Damý josparyn ázirleýdi qamtamasyz etý jáne josparlaýdaǵy derbestikti keńeıtý úshin QR Ulttyq ekonomıka mınıstrligine usynys engizý, – dedi Altaı Berdiqulov.

Sonymen qatar Tekserý komıssııanyń tóraǵasy kvazımemlekettik sektorǵa erekshe nazar aýdardy. Byltyr 11 uıym jyldy 26,8 mlrd teńge shyǵynmen aıaqtaǵan. Olar: «Almatyelektrotrans» JShS, «Almaty jylý jelileri» JShS, «Almatyteplokommýnenergo» JShS, «Grand Hall Unity» JShS, «Almtreıd» JShS, «Almaty Business Development Company» jáne «Metropolıten» KMK, «Almaty sý» KMK, «Almaty Tazalyq» KMK, «Almaty qalasynyń qutqarý qyzmeti» KMK, «№1 qalalyq perzenthana».

Bıyl «Almaty sý», «Almaty Tazalyq», «Almatyelektrotrans» syndy iri kásiporyndarǵa aýdıt júrgizý josparlanǵan.

Eske salaıyq, buǵan deıin Almatyda byltyr bıýdjetten 47 mlrd teńge ıgerilmegenin jazǵanbyz.