Tekserý azaısa da, anyqtalǵan quqyq buzýshylyq kólemi 76%-ǵa ósken — Qarjy mınıstrligi
ASTANA. KAZINFORM — Qazaqstan Respýblıkasy Qarjy mınıstrligi ishki memlekettik aýdıt júıesin damytýdyń jańa kezeńin aıqyndaıtyn 2030 jylǵa deıingi strategııalyq qujat – Іshki memlekettik aýdıtti damytý tujyrymdamasyn alǵash ret bekitildi.
Tujyrymdamanyń qabyldanýy memlekettik basqarýdy damytýdyń mańyzdy kezeńi bolyp tabylady jáne táýekelderdiń aldyn alýǵa, táýekelge baǵdarlanǵan tásilge, tsıfrlyq tehnologııalar men derekterdi taldaýǵa negizdelgen ishki memlekettik aýdıttiń zamanaýı modeline kóshýdi bildiredi.
— Júrgizilip jatqan ózgeristerdiń tıimdiligi naqty nátıjelermen rastalyp otyr. 2026 jyldyń birinshi jartyjyldyǵynyń qorytyndysy boıynsha 2025 jyldyń sáıkes kezeńimen salystyrǵanda aýdıtorlyq is-sharalardyń sany 7%-ǵa qysqardy, al anyqtalǵan qarjylyq quqyq buzýshylyqtardyń somasy 76%-ǵa ulǵaıdy, — delingen vedomstvonyń habarlamasynda.
Sonymen qatar aýdıt júrgizilmesten qabyldanǵan preventıvtik sharalar qoldanylǵan bıýdjet qarajatynyń kólemi eki eseden astam ósip, 200 mlrd teńgeden 500 mlrd teńgege deıin jetti.
Mundaı úrdis baqylaý júktemesin azaıta otyryp, táýekelderdi anaǵurlym dál anyqtaýǵa múmkindik beretin ıntellektýaldy aýdıtke kóshýdiń aıqyn dáleli bolyp tabylady.
Tujyrymdama memlekettik qarjynyń tıimdi paıdalanylýyn arttyrýǵa, memlekettik basqarý sapasyn jaqsartýǵa jáne bıýdjettik protsesterdiń ashyqtyǵyn qamtamasyz etýge baǵyttalǵan.
Mınıstrliktiń málimetinshe, búgingi kúni ishki memlekettik aýdıtti damytý tek baqylaýdy ǵana emes, sonymen qatar táýekelderdi ýaqtyly anyqtaýǵa jáne basqarýshylyq sheshimderdi aldyn ala qabyldaýǵa múmkindik beretin tetikterdi qalyptastyrýdy talap etedi.
— Memlekettik aýdıttiń bolashaǵy – tehnologııalarda, sapaly derekterde jáne quqyq buzýshylyqtardyń aldyn alýda. Bizdiń mindetimiz – memlekettik resýrstardyń tıimdi paıdalanylýyn qamtamasyz etý jáne qoǵamnyń memlekettik qarjyny basqarý júıesine degen senimin arttyrý, — dedi Qarjy mınıstri Madı Tákıev.
Tujyrymdamany iske asyrý halyqaralyq ozyq tájirıbege sáıkes keletin ári Qazaqstan Respýblıkasynyń ornyqty damý mindetterine jaýap beretin zamanaýı ishki memlekettik aýdıt júıesin qalyptastyrýǵa múmkindik beredi.
Qazaqstan tsıfrlandyrýǵa basymdyq bere otyryp, ishki memlekettik aýdıtti damytýdyń uzaq merzimdi strategııasyn qalyptastyryp otyrǵan óńirdegi alǵashqy memleketterdiń birine aınalmaq.
Aıta keteıik, Qarjy mınıstrligi bızneske arnalǵan jańa onlaın servısti iske qosty.
