Tekseristerdiń aldyn ala nátıjesi boıynsha Pedıatrııa ınstıtýtynda S gepatıtin juqtyrý bolǵan joq - mınıstr J.Dosqalıev
ASTANA. Jeltoqsannyń 29-y. QazAqparat /Gúlmıra Álıakparova/ - Búgin QR Densaýlyq saqtaý mınıstri Jaqsylyq Dosqalıev Almatydaǵy Pedıatrııa jáne balalar hırýrgııasy ǵylymı ortalyǵynda balalardyń S gepatıtin juqtyrýyna qatysty vedomstvonyń arnaıy komıssııasynyń júrgizgen zertteýleriniń aldyn ala nátıjelerin jarııa etti,
dep habarlaıdy QazAqparat.
J.Dosqalıevtiń atap kórsetkenindeı, atalmysh jaǵdaıdyń mán-jaıyn anyqtaý úshin arnaıy qurylǵan komıssııanyń quramyndaǵy toptyń biri, atalmysh Pedıatrııa ınstıtýtynda 2007-2009 jyldar aralyǵynda emdelgen barlyq 3 myń balanyń aýrý tarıhtaryn jiti qarap, nátıjesinde 106 naýqastyń qandarynyń quramynda aýrýhanaǵa túserdiń aldynda S gepatıti bolǵandyǵyn anyqtaǵan. Qazir mınıstrdiń tapsyrmasy boıynsha, osy 106 balanyń Instıtýtqa túspes buryn emdelgen medıtsınalyq mekemelerine tekserister júrgizilýde.
«Komıssııanyń búgingi kúnge deıin júrgizgen tekseris jumystarynyń nátıjesi boıynsha Pedıatrııa ınstıtýtynda ınfektsııany juqtyrý derekteri bolǵan emes», - dep atap ótti mınıstr.
Mınıstr, sondaı-aq «Gepatıttiń ınfektsııasy Pedıatrııa ınstıtýtyna respýblıkalyq Qan ortalyǵynan jetkizilgen qan jáne qan preparattarynyń quramynda bolǵan», - degen joramaldar men aıyptaýlardy joqqa shyǵardy. Ony bul máselemen jete aınalysqan komıssııanyń quramyndaǵy ekinshi top anyqtaǵan. Onyń ústine, sanıtarlyq epıdemıologııalyq qadaǵalaý organdary Qan ortalyǵyna 2008-2009 jyldar aralyǵynda 6 ret tekseris jumystaryn júrgizgen kórinedi.
J.Dosqalıev juqpa, gepatıttiń atalmysh túrimen aýyratyn respýblıkalyq Qan ortalyǵynyń eki donory arqyly kelýi múmkin degen aqparattyń da rastalmaǵandyǵyn jetkizdi. Al qandardyń bir-birine aralastyrylýy - medıtsınalyq talaptardyń eshbir normalaryna saı kelmeıtindigin jáne ondaı úrdis eshbir ýaqytta qoldanylmaıtyndyǵyn qadap aıtty.
«Komıssııa áli de jumysyn jalǵastyratyn bolady. Kelesi jyldyń ishinde de jumys isteýi múmkin. Al kináli tulǵalar, meıli ol aýdandyq, ne oblystyq deńgeıde bolsyn - olar tıisti jazalaryn tartatyn bolady. Bul másele eshbir jerde qaıtalanbaıtyndaı bolý qajet», - dedi ol.
Aıta keteıik, Dúnıejúzilik densaýlyq saqtaý uıymynyń málimetteri boıynsha álemde S gepatıtimen 200 mıllıon adam aýyrady. Aldaǵy ýaqytta onyń sany 500 mıllıonǵa jetýi yqtımal degen boljam bar. S gepatıtiniń ınfektsııasy qandaı da bir preparattardy qanǵa engizý kezinde ǵana juǵatyndyqtan, ol aýa arqyly taramaıdy. Jynystyq joldarmen berilý múmkindigi de óte tómen.
