Tekseriske qarsylyq bildirgen: Túrkistanda sottalǵan 6 adam ózderin jaraqattady
«Túrkistan oblysynda sottalǵan 6 azamat barshanyń kózinshe óz denelerin bolymsyz deńgeıde keskiledi. Munyń sebebin olar tintý jumystarymen jáne qaýipsizdik mekemesiniń ishki tártibimen kelispegendikten dep túsindirdi. Tintý sharalary Ulttyq ulannyń, ózindik qaýipsizdik qyzmetiniń, prokýratýra ókilderiniń jáne oblystyq Qylmystyq-atqarý júıesi departamenti basshylyǵynyń qatysýymen ótken bolatyn», - dep jazady komıtettiń baspasóz qyzmeti.
Tintý qorytyndysynda paıdalanýǵa tyıym salynǵan zattar tabylyp, tárkilengen.
«Qatań tártipte jazasyn ótep jatqan birneshe sottalǵan adam qylmystyq-atqarý júıesi qyzmetkerleriniń zańdy talaptaryna beıádep sózben narazylyq bildirip, ózderine qasaqana dene jaraqatyn saldy. Olarǵa dereý medıtsınalyq kómek kórsetildi. Qazir jaǵdaılary qanaǵattanarlyq, aýrýhanaǵa jatqyzýdy qajet etpeıdi», - deıdi Túrkistan oblysy boıynsha Qylmystyq-atqarý júıesi departamentiniń bastyǵy Talǵat Ábdiranbaev.
Sondaı-aq, departament bastyǵy ózerine qol salǵandardyń kisi óltirý, qaraqshylyq jáne esirtki saýdasy úshin jazasyn ótep jatqanyn atap ótti.
Qarsylyq sharasynyń bastamashysy Qylmystyq kodekstiń 297-baby 3-bóligi 1, 3-tarmaǵy (esirtki quraldaryn zańsyz saqtaý, daıyndaý jáne ótkizý) boıynsha 10 jylǵa sottalǵan 28 jastaǵy azamat ekeni belgili boldy.
«Mán-jaıdy anyqtaý úshin oqıǵa ornyna jedel-tergeý toby keldi. Atalǵan fakti tirkelip, qyzmettik tergeý júrgizilýde. Qazir ICh-167/9 qaýipsizdigi barynsha joǵary mekemede aýyr jáne asa aýyr qylmystar jasaǵany úshin 485 sottalǵan ustalady», - dep jazylǵan departamenttiń dereginde.