Tekserilgen áleýmettik nysandardyń jartysynan astamy múmkindigi shekteýli adamdar úshin yńǵaısyz
ASTANA. QazAqparat - Qazaqstanda tekserilgen áleýmettik nysandardyń jartysynan astamyn múmkindigi shekteýli adamdar úshin qaıta yńǵaılaý kerek.
Búgin Parlament Májilisi Áleýmettik-mádenı damý komıtetiniń keńeıtilgen otyrysynda Densaýlyq saqtaý jáne áleýmettik damý vıtse-mınıstri Svetlana Jaqypova osylaı málim etti. Komıtet otyrysynda múmkindigi shekteýli adamdardyń qoǵamǵa beıimdelýi máselesi talqylandy.
Vıtse-mınıstrdiń aıtýynsha, 2012 jyldan bastap nysandardyń qoljetimdiligi jaǵdaıyn baǵalaý jumystary bastalǵan. «Jalpy, múmkindigi shekteýli adamdar úshin qoljetimdilik pasportyn qurý maqsatynda 55 myńnan astam áleýmettik ınfraqurylymdy tekserip shyǵý kerek. 1 qyrkúıektegi jaǵdaı boıynsha shamamen 24 myńǵa jýyq nysan pasporttaldy. Sonyń ishinde 18,5 myń nysannyń nemese 78,7 paıyzynyń múmkindigi shekteýli azamattar úshin beıimdeý qajetiligi anyqtalyp otyr», - deıdi S. Jaqypova. Onyń sózine qaraǵanda, 55 myń nysannyń 5,5 myńnan astamy ǵana múmkindigi shekteýli adamdar úshin qoljetimdi.
Sonymen qatar, vıtse-mınıstr kedergisiz orta qalyptastyrý josparyna sáıkes, 2014 jyly 2 135 nysandy múmkindigi shekteýli adamdar úshin beıimdeý kózdelgenin atap ótti. Ony ishinde 697-i nysandy qaıta beıimdeý «Jumyspen qamtýdyń jol kartasy» baǵdarlamasymen, al 1438 nysan jergilikti bıýdjet qarajaty esebinen atqarylady.
