Tekelide júkti bop qalǵan 10-synyp oqýshysynyń isin polıtsııa tergep jatyr
Júkti bolǵan oqýshy qyz Tekeli qalasyndaǵy №5 mekteptiń 10-synybynda oqıdy. Qazir ol balasyn aldyrtyp tastapty.
Jetisý oblystyq bilim basqarmandaǵylar balanyń tolyq otbasynan shyqqanyn jetkizdi.
«Tekeli qalalyq polıtsııa bólimi osy is boıynsha tergeý amaldaryn júrgizip jatyr. Sonyń nátıjesinde zańdy sharalar qabyldanady»,- dedi Tekelidegi №5 mekteptiń dırektory Janar Jaqypbekova.
Al qalǵan júkti bolǵan eki oqýshynyń biri Panfılov aýdanynyń Úsharal aýylyndaǵy mektepte 9-synypta, ekinshisi Sarqan qalasyndaǵy №1 mektep-gımnazııada 10-synypta oqıdy.
Eki oqýshy qyzdyń qursaǵyna bala bitkeli úsh aıdan asqan. Ekiqabat oqýshylar mektepke kelip, sabaǵyn oqyp júr.
«Balasynyń ómiri jáne balasynyń qaýipsizdigi úshin árbir ata-ana jaýapty ekenin umytpaý kerek. Balanyń kimmen qandaı qarym qatynasta bolǵanyn, onyń jáne dostarynyń kim ekendigin, keshki ýaqytta áleýmettik jelide nemese basqa jerde kimmen baılanysyp otyr, sodan keıin balanyń minez-qulqyna da basa nazar aýdaryp otyrý kerek»,- deıdi Jetisý oblystyq bilim basqarmasynyń tárbıe isi jónindegi bas mamany Rýslan Arslanov.
Bilim basqarmasyndaǵylar jalpy oqýshylardyń osyndaı keleńsiz jaıttarǵa tap bolyp jatqany jasyryn saýalnama, túrli psıhologııalyq test arqyly anyqtalatynyn aıtady.
Esterińizge sala keteıik, erte júktilik boıynsha oqýshylar arasynda túsindirý jumystaryn júrgizgen dál osy Tekeli qalasyndaǵy №8 mekteptiń basy daýǵa qalǵan bolatyn.
Sebebi sharany uıymdastyrýshylar balalarǵa jezókshelerge beriletin aqyl-keńes jazylǵan broshıýrany taratyp bergen.
Muny kórgen oqýshylardyń ata-analary jaǵasyn ustap, shý kóterdi.
Osy daýdan keıin mekteptiń tárbıe isi jónindegi orynbasary sógis aldy, al jezókshelerge arnalǵan nusqaýlyqty oqýshylarǵa taratyp bergen aýrýhana psıhology jumystan ketkenin habarlaǵan bolatynbyz.
Sondaı-aq Jetisý oblysynda úsh oqýshynyń júkti bolǵanyn jarııaladyq.
