Tekelide týrızm qarqyndy damyp keledi
TALDYQORǴAN. QazAqparat - Tekeli qalasyndaǵy «Tekesý» týrıstik keshen qurylysynyń jobasyn júzege asyrýǵa 159,6 mln. teńge tartylyp, ıgerildi. Qazirgi kezde bul aýmaqta 400 metrlik jáne 800 metrlik syrǵanaq joly, ballonmen, shanamen syrǵanaýǵa arnalǵan joly bar týrıstik bazanyń qurylysy aıaqtaldy. Sonymen qatar munda qys mezgilinde shańǵy jáne snoýbordta syrǵanaý, jazda taý velosıpedimen ekstremaldy syrǵanaý joldaryn tóseý jumystary bitti. Bul týraly Tekeli qalasynyń ákimi Baqtııar Ónerbaev halyq aldynda esep berý jıynynda aıtty, dep habarlaıdy «QazAqparat» Almaty oblysy ákiminiń baspasóz qyzmetine silteme jasap.
B. Ónerbaevtyń aıtýynsha, Tekeli qalasynyń tabıǵı landshafty men klımattyq ereksheligi qala men onyń mańaıynda týrızmdi damytýǵa zor múmkindik beredi. Sondyqtan týrıstik sala Almaty oblysy basshylyǵynyń aıryqsha nazarynda. Qazirgi kezde oblys ákimi A. Batalovtyń tapsyrmasyna sáıkes arnaıy týrıstik karta ázirlenip, týrıstik bazalar men basqa da týrıstik nysandardyń qurylysyna ınvestor tartý isi jolǵa qoıyldy. Bul baǵyttaǵy jumys bıylǵy jyly da jalǵastyrylatyn bolady.
Tekelide, sonymen qatar balalar men jasóspirimder týrızmi boıynsha taý, sporttyq jáne ólketaný baǵytyndaǵy týrızm ortalyǵy jumys isteıdi.
B. Ónerbaev týrızmdi damytý sporttyq salamen tyǵyz baılanysty ekenin de atap ótti. Máselen, Tekeli qalasynda mamandandyrylǵan balalar men jasóspirimder sporttyq mektebi jumys istep, ondaǵy sektsııalarda 600-deı bala jattyǵady. Bul oraıda qala ákimi 2016 jyly birinshi razrıadtaǵy 18 sportshy, 11 sport sheberligine kandıdat daıyndalǵanyn da tilge tıek etti.
Baıandamashylardyń sózinen keıin kezdesý dıalog túrinde jalǵasty. Zalǵa jınalǵan kópshilik ózderin tolǵandyryp júrgen suraqtaryn qoıdy. Atap aıtqanda, turǵyndar tozyǵy jetken ınjenerlik kommýnıkatsııalardy aýystyrý, mádenıet úıin ashý, medıtsınalyq qyzmet kórsetý sapasyn arttyrý, mektepterge kúrdeli jóndeý júrgizý jáne basqa da máselelerdi kóterdi. Bul suraqtardyń barlyǵyna Tekeli qalasynyń ákimi B. Ónerbaev pen Rýdnıchnyı aýylynyń ákimi S. Vıshnıakov jaýap berdi.
