Tekelide mektep aýlasyndaǵy qaraǵaılardyń jappaı kesilýine turǵyndar qarsy shyqty

TALDYQORǴAN.QazAqparat - Jetisý oblysynyń Tekeli qalasyndaǵy №8 mekteptiń aýlasyndaǵy qaraǵaılardyń kesilýine turǵyndar qarsy shyqty. Osy jaıttan keıin birden mektep dırektory kesilgen aǵashtardyń ornyna jańasyn otyrǵyzyp, ony jaıqaltýǵa mindetteldi,- dep habarlaıdy QazAqparat tilshisi.

«Jas qaraǵaılardy kesip tastady. Mektep aýlasymen júrý múmkin emes. Bul qaraǵaılardy biz synyptastarymyzben 1989 jyly ózimiz otyrǵyzǵan bolatynbyz. Jas aǵash. Sumdyq-qoı!» - deıdi qaraǵaılardyń jappaı kesilgenin vıdeoǵa túsirgen avtor.

Tekeli qalasynyń ákimdigi osy jaıtqa baılanysty bylaı dep jaýap berdi.

«15 shildede qala ákiminiń bastamasymen Tekeli qalalyq Qoǵamdyq keńesiniń kezekten tys otyrysy ótkizildi. Jıynda №8 orta mektebiniń aýmaǵynda oryn alǵan másele (quzyrly organdardyń ruqsatynsyz aǵashtardy kesý boıynsha) talqylandy. Otyrysta Tekeli qalasynyń ákimi B.Moldahmetov, máslıhat hatshysy N.Kalınovskıı, bilim bólimi basshysy N.Estibaev, polıtsııa bólimi basshysynyń orynbasary A.Bıtaev, №8 orta mektebiniń dırektory J. Jakpekova jáne jergilikti BAQ ókilderi pikirlerin ortaǵa saldy.

Jıyn sońynda mektep dırektoryna zań aıasynda shara qoldanylyp, kesilgen aǵashtardyń ornyna 10 eselengen mólsherde kóshetter otyrǵyzyp, onyń kógaldanyp ósýin qadaǵalaý usynyldy», - delingen Tekeli qalasy ákiminiń baspasóz qyzmeti taratqan habarlamada.

Foto: www.instagram.com/wf_rk