Tekelide qusbegiler otbasy saılaýda óz tańdaýyn jasady

TALDYQORǴAN. QazAqparat - Búgin Tekelidegi №1031 saılaý ýchaskesinde elimizge tanymal saıatshy, atbegi, qusbegi, Ulttyq sport qaýymdastyǵynyń respýblıkalyq deńgeıdegi tóreshisi, eńbek ardageri Búrkitbaı Faızolla uldary Ǵalymbek pen Jasulan, kelinderi jáne nemerelerimen birge óz tańdaýlaryn jasady,- dep habarlaıdy QazAqparat tilshisi.

Búrkitbaı Faızollauly bala kezden baba murasyn qasıet tutqan, jylqynyń tektiligin, qyrannyń qyraǵylyǵyn boıǵa darytyp, kórgen-bilgenin iske jarata júrip, ata kásiptiń tilin meńgergen jan. Onyń kúmis tuıaq tulpar baptap, tazy ertip, qylysh tumsyq, qaıqy tós qyran qus ushyrǵan bekzat bolmysy, ulttyq salt-dástúr, óner men kásipti dáriptep, ony óskeleń urpaqqa úıretip júrgen ustazdyq ulaǵaty barlyq qurmetke laıyq. Qusbegi, atbegi Búrkitbaıdyń esimi tek Jetisý óńirine ǵana emes, ata dástúri men kásibin qurmet tutatyn qazaq jurtyna málim.

Uly Jasulan áke jolyn jalǵap, baby kelisken qyran qustaryn óńirlik, respýblıkalyq saıatshylyq jarystaryna qosyp, mańdaıy jarqyrap júlde alyp júr. Nemeresi Álǵazız da ata men aǵa tálimine den qoıyp, qus baptaýdyń qyr-syryn meńgerýde.

«El tizginin senip tapsyratyn tulǵany saılaýdyń, azamattyq paryzdy óteýdiń mán-mańyzyn ósip kele jatqan urpaqqa uǵyndyrý úshin saılaýǵa bala-shaǵamyzben birge qatysyp, saıası naýqanǵa jaýapkershilikpen qarap jatyrmyz. Qazaqstannyń ár azamaty el bolashaǵy úshin mańyzdy saılaýdan qalys qalmaýǵa tıis dep bilemin. Іrgemiz berik, birligimiz bekem, tirligimiz berekeli bolsyn!» - dedi áýlettiń arqasúıer abyz atasy Búrkitbaı Faızollauly.