Tekeli qalasynyń ákimi vorkaýtshylarmen birge týrnıkke tartyldy
TALDYQORǴAN.QazAqparat - Almaty oblysyndaǵy Tekeli qalasynyń ákimi Baqtııar Ónerbaev keshendi demalys ornynyń ashylýynda 7 ret týrnıkke tartylyp, óner kórsetti. 51 jastaǵy ákim sporttyq qabiletin vorkaýtshylar shynyǵatyn beltemirlerde synap kórdi, dep habarlaıdy QazAqparat tilshisi.
Tekelide jańadan ashylǵan demalys orny Prezıdenttiń «Bolashaqqa baǵdar: rýhanı jańǵyrý» maqalasynyń «Týǵan jer» baǵdarlamasy aıasynda paıdalanýǵa berildi. Elbasynyń bastamasyna qoldaý bildirgen jergilikti kásipkerler Qora ózeniniń boıyna Street Workout alańyn jasap, vorkaýtshylar shynyǵatyn beltemirlerdiń túr-túrin jáne balalar oınaıtyn alańqaı men altybaqandar ornatyp, halyqtyń ıgiline tapsyrdy.
Bul ıgi isterine kásipkerler 5 mln teńgege jýyq qarjy jumsaǵan. Astananyń 20 jyldyq mereıtoıyna oraı paıdalanýǵa berilgen demalys ornynyń ashylý saltanaty ulttyq naqyshta ótti. Qazaq halqynyń dástúrinen úzindiler kórsetilip, ulttyq ónerimiz ulyqtaldy. Jańa demalys orny bolashaqta «Rýhanı jańǵyrý» dep atalýy múmkin. Mundaı bastamany Tekeli qalasynyń ákimi usynyp, jergilikti turǵyndar birden qoldady.
«Tekeli elimizdegi ózge qalalardan taý baýraıyndaǵy saf aýasymen erekshelenip turatyn ásem de, kórikti qala ǵoı. Al jańadan ashylǵan demalys ornynyń ózi qandaı tamasha. Jaǵalaýda terekter jaıqalyp, barlyq jer kóleńke. Jaz boıy ózenniń boıynda balalarymyz oınaıtyn boldy. Óte qýanyshtymyz. Balalar úshin ornatqan oıyn alańdarynyń bári sapaly eken», - dedi Tekeli qalasynyń turǵyny Dana Bedelbaeva.
