Tekeli qalasynda úshinshi qabattaǵy órt kezinde 6 adam qutqaryldy

TEKELІ. QazAqparat - Almaty oblysynyń Tekeli qalasynda 4 qabatty kóppáterli turǵyn úıdiń birinde órt shyqty, dep habarlaıdy QazAqparat TJM baspasóz qyzmetine silteme jasap.

Órt týraly habarlama Almaty oblysynyń TJD-syna saǵat 16.10-da kelip túsken.

«Joǵary dárejeli shaqyrtý boıynsha Tekeli, Taldyqorǵan qalalarynyń jáne Qarabulaq aýylynyń órt sóndirý bólimsheleriniń jasaqtary dereý jiberildi. Alǵashqy órt sóndirý bólimsheleri shaqyrtý ornyna belgilengen normatıvtik ýaqytta keldi. Páterdiń terezesinen jalyn baıqaldy, sondaı-aq barlaý barysynda turǵyndardy evakýatsııalaý joldary qoıý tútin jáne ystyq bolǵany anyqtaldy. Órt kórshi páterler men ǵımarattarǵa qaýip tóndirdi», delingen habarlamada.

TJD qyzmetkerleri bir mezgilde órtti sóndire otyryp, azamattardy qutqarý jáne evakýatsııalaý jumystaryn uıymdastyrdy.

«6 adam qutqaryldy, onyń ishinde 3 bala, sondaı-aq 11 adam, onyń ishinde 4 bala evakýatsııalandy. Órt ǵımarattyń shatyryna jáne kórshi páterlerge taralýyna jol berilmedi. Saǵat 16.48-de, 16 sharshy metrdi sharpyǵan hrt sóndirilgen (3-qabatta, eki bólmeli páter ishinde jıhaz ben zat janǵan). Oqys oqıǵadan eshkim zardap shekpegen», delingen habarlamada.

Qazir órt qalaı shyqqany anyqtalyp jatyr. Oqıǵa ornyna Almaty oblysy TJD Órt synaq zerthanasy jiberildi.

Órtti sóndirýge Almaty oblysy TJD-nyń 11 qyzmetkeri men 4 tehnıkasy, «Órt sóndirýshi» JShS-nyń 3 qyzmetkeri men 1 tehnıkasy, Qalalyq polıtsııa bóliminiń 3 qyzmetkeri men 1 tehnıkasy jumyldyryldy.