Tekeli ákimi zańsyz saýdadaǵy 5 lıtrlik araqpen kúrespek
TALDYQORǴAN. QazAqparat - Almaty oblysyndaǵy Tekeli qalasynyń ákimi Baqtııar Ónerbaev zańsyz 5 lıtrlik araqty satqandardy ustap bergenderge bir jalaqysyn berýge daıyn ekenin jetkizdi, dep habarlaıdy QazAqparat tilshisi.
«5 lıtrlik polıetılen bótelkedegi «Óskemenniń ishimdigi» Tekelide zańsyz saýdalanýda. Biraq biz zańsyz jumys istep ishimdiktiń osy túrin saýdalap jatqandardy naqty taba almaı otyrmyz. Sol sebepti, qalaǵa bul araqty jetkizip, kóterme baǵamen saýdalap jatqan adamdy bizge taýyp bergen adamǵa men bir aılyq jalaqymdy berýge daıynmyn», - dedi Tekeli qalasynyń ákimi Baqtııar Ónerbaev.
Al Baqtııar Ónerbaevtyń aıtýynsha, onyń bir aılyq tabysy 300 myń teńge.
Qala ákimi mundaı sheshimdi qaıǵyly jaǵdaıdan keıin qabyldaǵanyn aıtady.
«2019 jyldyń qarasha aıynda qalada qaıǵyly jaǵdaı boldy. Bir úıden er jáne áıel adamnyń múrdesi tabyldy. Al ústel ústinde «Óskemenniń ishimdigi» tur. Sondyqtan turǵyndardyń ómirine alańdaǵandyqtan, osyndaı sheshim qabyldap otyrmyn», - dep tolyqtyrdy Baqtııar Ónerbaev.
Eske sala keteıik, buǵan deıin qoǵamdyq orynda ishimdik ishken úsh turǵynnyń ústinen túsken ákim Baqtııar Ónerbaev olardy zań aldynda jaýapqa tartqan bolatyn.
