Jetisýda Quryltaı depýtattaryn saılaýdy qoldaýǵa arnalǵan buqaralyq júgirý ótti
TALDYQORǴAN. KAZINFORM – Tekeli qalasyndaǵy eń uzyn Dinmuhamed Qonaev kóshesinde 23 tamyzda ótetin Quryltaı depýtattaryn saılaýdy qoldaý maqsatynda buqaralyq júgirý uıymdastyryldy. Salaýatty ómir saltyn nasıhattap, turǵyndardy belsendi qozǵalysqa shaqyrǵan is-sharaǵa qala turǵyndary, jastar men sportsúıer qaýym qatysty.
Jappaı júgirýge qatysýshylar D.Qonaev kóshesindegi temirjol ótkelinen bastap, baqylaý alańyna deıingi 2,5 shaqyrym joldy júgirip ótti. Sporttyq shara qala turǵyndaryna kóterińki kóńil-kúı syılap, densaýlyqqa paıdaly ádetti qalyptastyrýdyń mańyzyn taǵy bir márte aıqyndady.
Jappaı júgirýge qatysqandardyń eń úlkeni – 55 jastaǵy qalalyq Mádenıet úıiniń ádiskeri Farıda Kópeldesova bolsa, eń kishisi – 12 jastaǵy jasóspirim.
Qatysýshylar máre syzyǵyn kesip ótkennen keıin Tekeli qalasy ishki saıasat bóliminiń basshysy Nurjamal Shohanova men «Jetisý oblysynyń buqaralyq sportty damytý jáne sporttyq is-sharalardy ótkizý sport klýby» KMM Tekeli qalalyq fılıalynyń basshysy Ǵalymjan Súleımenov kópshilikke jyly lebizderin jetkizip, aldyńǵy qatardan kóringen belsendilerdi marapattap, estelik syılyqtar tabys etti.
«Shapaǵat» Tekeli arnaýly áleýmettik kómek kórsetý ortalyǵynyń qyzmetkeri Erlan Kókeev júgirýdiń adam densaýlyǵyna ǵana emes, qoǵam belsendiligine de oń yqpal etetinin atap ótti.
– Men salaýatty ómir saltyn qoldaımyn. Sondyqtan júgirý marafonyna qulshynyspen qatystym. Aramyzda jastardyń kóp bolǵany qýantty. Jastar da, úlkender de densaýlyǵy myqty bolýy kerek. Sonda elge paıda tıgizetin is jasaı alady. Jalpy qoǵamdyq is-sharalarǵa belsene qatysý kerek. Aldymyzda elimizdiń damýyndaǵy jańa kezeń – Quryltaı depýtattaryn saılaý tur. Oǵan da bir kisideı qatysyp, azamattyq tańdaýymyzdy jasaǵanymyz jón, – dedi ol.
Deni saý ult – el damýynyń ózegi. Al qoǵamdyq ómirge belsendi aralasý – azamattyń el aldyndaǵy jaýapkershiligin sezinýdiń kórinisi. Sporttyq is-sharada bas qosqan qala turǵyndarynyń belsendiligi de osyny ańǵartty.
Júgirýge qatysqan 13 jastaǵy ıÝlıa Chýchakına sportpen turaqty aınalysatynyn aıtty.
– Men júgirý jarysyna aǵammen birge keldim. №1 orta mektebiniń 8-synybynda oqımyn. Sportqa janym qumar. Karate úıirmesine qatysamyn. Osyndaı buqaralyq is-sharalarǵa qatysyp, úlkenderden úırenerim kóp, – dedi ol.
Tekelide jappaı júgirý ótetinin áleýmettik jeliden kórgen Aqsý aýdanyndaǵy Arasan aýylynan bes jas sportshy arnaıy kelip qatysty. Olardyń eń kishisi – 12 jastaǵy Biregeı Qumar.
– Bizdi jeńil atletıkadan jattyqtyratyn aǵaıymyz alyp keldi. Ózi de jarysqa qatysty. Men máre syzyǵyn tórtinshi bolyp kesip, syılyqqa ıe boldym. Tekelidegi eń uzyn D.Qonaev kóshesiniń boıymen júgirip kele jatyp, keýdemdi maqtanysh kernedi. Týǵan jerimizdiń osyndaı tamasha jerlerin kórip, tanyp, keleshekte elimizdiń mártebesin bıiktetýge kúsh salýymyz kerek, – dep áserimen bólisti.
Sporttyq is-shara salaýatty ómir saltyn, belsendi azamattyq ustanym men qoǵamdyq birlikti nasıhattap, turǵyndardy ortaq iske jumylýǵa jáne el ómirindegi mańyzdy máselelerge beıjaı qaramaýǵa úndedi.
