Tekeli qalasynyń ákimi taǵaıyndaldy
ASTANA. KAZINFORM — Prezıdent Ákimshiliginiń kelisimimen jáne qalalyq máslıhat depýtattarynyń qoldaýymen Tekeli qalasynyń ákimi bolyp 44 jastaǵy Aıdos Beketaev taǵaıyndaldy, dep habarlaıdy Jetisý oblysy ákimdiginiń baspasóz qyzmeti.
Buǵan deıin ol Jetisý oblysynyń energetıka jáne turǵyn úı-kommýnaldyq sharýashylyq basqarmasynyń basshysy qyzmetin atqarǵan. Jańa ákimdi Tekeli qalasynyń aktıvine oblys basshysy Beıbit Isabaev tanystyrdy.
Aktıv otyrysynda Beıbit Isabaev Tekeli qalasynyń ákimi qyzmetin 4 jyl atqaryp, basqa jumysqa aýysýyna baılanysty qyzmetinen bosatylǵan Almas Ádilge qalanyń áleýmettik-ekonomıkalyq damýyna qosqan úlesi úshin alǵys bildirdi.
— Óńir basshysy jańa ákimge birqatar mindet júktedi. Atap aıtqanda, áleýmettik jáne kommýnaldyq ınfraqurylymdy odan ári damytý, jańa jumys oryndaryn ashý jáne ınvestıtsııa tartý tapsyryldy. Sonymen qatar týrızmdi damytý baǵytyndaǵy jumysty kúsheıtip, iske asyrylyp jatqan ınfraqurylymdyq jobalardy sapaly aıaqtaý mindetteldi, — delingen habarlamada.
Atap ótsek, Aıdos Beketaev memlekettik organdarda 16 jyldan astam ýaqyt eńbek etip keledi. Memlekettik qyzmettegi eńbek jolyn 2010 jyly bas maman qyzmetinen bastaǵan. Ár jyldary Almaty qalasy Túrksib aýdany ákimi apparatynyń abattandyrý bóliminiń bas mamany, kommýnaldyq sharýashylyq bóliminiń basshysy, aýdan ákiminiń orynbasary qyzmetterin atqarǵan. 2023 jylǵy qazan aıynan bastap Jetisý oblysynyń energetıka jáne turǵyn úı-kommýnaldyq sharýashylyq basqarmasynyń basshysy qyzmetin atqardy.
Osydan buryn Shyńǵys Árinov Almaty oblysynyń ákimi laýazymyna taǵaıyndalǵanyn jazǵanbyz.
