Tekeli qalasynda ıtin óltirip, ıesin sabaǵan azamat 1 jylǵa bas bostandyǵynan aıyryldy

TALDYQORǴAN. KAZINFORM - Jetisý oblysy Tekeli qalalyq soty densaýlyqqa jeńil zııan keltirý jáne janýarlarǵa qatygezdik tanytý boıynsha aıyptalǵan 3 adamǵa qatysty qylmystyq isti qarady (QR QK 108-babynyń 1-tarmaǵy 4-bóligi, 316-babynyń 3-bóligi 2-tarmaǵy). Nátıjesinde K. esimdi azamat 1 jylǵa bas bostandyǵynan aıyryldy.

Jetisý oblysy, Tekeli qalalyq soty baspasóz qyzmetiniń málimetine súıensek, oqıǵa qyrkúıek aıynda Tekeli qalasynda bolǵan. Úsh azamat ishimdik ishýge jınalǵan. Jolda taǵy bir tanystaryn keziktirip, qatarlaryna qosyp alǵan. Dastarhan basynda ózara janjal shyǵyp, bir adam jaraqat alady.

«Janjaldan keıin K. jáne S. jábirlenýshiniń ıtin óltirip, onyń etinen tamaq daıyndamaq bolǵan. Sol maqsatta olar ıtti vannaǵa aparyp óltirgen, biraq onyń etin paıdalaný oıynan bas tartqan, sebebi bolǵan jaǵdaıdan keıin ózderin jaısyz sezingen» - delingen habarlamada.

Jábirlenýshi sotqa aıyptalýshylarmen tatýlasýyna jáne keltirilgen zııandy óteýine baılanysty qylmystyq isti toqtatýdy surap júgingen. Al, aıyptalýshylar istegen isterine ókinetinderin aıtyp, kinálaryn tolyq moıyndaǵan. Sot jábirlenýshiniń ótinishin qanaǵattandyryp, QR QK 68-babyna sáıkes eki azamatqa qatysty isti toqtatqanmen úshinshi azamatqa kináni jeńildetetin mán-jaılardy eskere otyryp, QR QK 108-babynyń 1-bóligi jáne 316-babynyń 2-bóliginiń 2-tarmaǵy boıynsha kináli dep tanyp, 1 jyl merzimge bas bostandyǵyn shekteý jazasyn taǵaıyndady. Úkim zańdy kúshine endi. Eske salaıyq buǵan deıin Jetisý oblysynda esirtki saqtaǵan 33 jastaǵy er adamnyń ustalǵanyn jazǵanbyz.