Tekeli qalasynda ekskavator 11 jastaǵy qyzdy qaǵyp óltirdi
ASTANA. KAZINFORM — Jetisý oblysy Tekeli qalasynda jaıaý júrginshiler ótkelimen ótip bara jatqan 11 jastaǵy qyzdy ekskavator qaǵyp, oqýshy oqıǵa ornynda qaza tapty. Qazir jol-kólik oqıǵasyna baılanysty qylmystyq is qozǵaldy.
Aldyn ala málimet boıynsha, Volvo markaly dońǵalaqty ekskavatordyń júrgizýshisi qıylystan ótý kezinde jaıaý júrginshiler ótkelimen joldy kesip ótip bara jatqan kámeletke tolmaǵan qyzdy qaǵyp ketken. Alǵan jaraqattary saldarynan qyz bala kóz jumdy.
— Kólik júrgizýshisi ustalyp, ýaqytsha ustaý ızolıatoryna qamaldy. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan qajetti tergeý amaldary júrgizilip jatyr. Tergeý barysy Polıtsııa departamenti basshylyǵynyń baqylaýynda, — delingen Jetisý oblysy Polıtsııa departamenti taratqan aqparatta.
Polıtsııa júrgizýshilerdi jaıaý júrginshiler ótkeline jaqyndaǵanda barynsha muqııat bolýǵa, baǵdarsham belgilerin qatań saqtaýǵa jáne joldaǵy jaýapkershilik pen saqtyq adam ómirine tikeleı áser etetinin umytpaýǵa shaqyrady.
Budan buryn Túrkistan oblysynda júkti áıel men eki balany qaǵyp óltirgen mas júrgizýshi sottalǵanyn jazdyq.
