Tekeli energokesheni elektr energııasyn óndirý kólemin eki jylda 53 MVt-qa ulǵaıtty
ASTANA. KAZINFORM — Bul jobalardy iske asyrý 2027 jyldyń birinshi toqsanynda eldegi energııa tapshylyǵy máselesin sheshýge, al 2029 jylǵa qaraı elektr energııasynyń turaqty profıtsıtine shyǵýdy qamtamasyz etýge múmkindik beredi.
Energetıka mınıstrligi el ekonomıkasynyń ósip kele jatqan qajettilikterin qamtamasyz etý maqsatynda generatsııalaıtyn qýattardy arttyrý boıynsha júıeli jumysty jalǵastyrýda.
Memleket basshysynyń jańa energetıkalyq qýattardy iske qosý jónindegi tapsyrmasyn oryndaý aıasynda Jetisý oblysyndaǵy «Tekeli energokesheni» JShS-in jańǵyrtýdyń kezekti kezeńi aıaqtaldy. Paıdalanýǵa qýaty 17 MVt bolatyn úsh kádege jaratýshy qazandyq pen generatory bar bý týrbınasy engizildi.
Jobany iske asyrý energokeshende júrgizilip jatqan jańǵyrtý jumystarynyń jalǵasy boldy. Buǵan deıin, 2025 jyly nysanda jańǵyrtýdyń eki kezeńi sátti aıaqtalyp, jalpy qýaty 36 MVt bolatyn úsh gaztýrbınalyq qondyrǵy paıdalanýǵa berildi. Nátıjesinde «Tekeli energokesheniniń» belgilengen qýatynyń jıyntyq ósimi 53 MVt boldy.
Bıyl Qazaqstanda dástúrli jáne jańartylatyn energııa kózderiniń 2,6 GVt qýatyn paıdalanýǵa berý josparlanýda. Tórt bý-gaz qondyrǵysy, tórt jel elektr stantsııasy jáne bes kún elektr stantsııasy iske qosylady. Sonymen qatar Atyraý men Tekeli qalalaryndaǵy eki elektr stantsııasyn keńeıtý jumystary júrgizilýde. Buǵan deıin Qyzylordada qýaty 240 MVt bolatyn bý-gaz qondyrǵysy iske qosylǵan bolatyn.
Aıta ketelik SQO-nyń energetıkalyq nysandaryn jónge keltirýge 24 mlrd teńgeden astam qarjy baǵyttalatyny týraly jazǵan edik.
