Tek velosıped urlaýmen aınalysqan - Almaty (FOTO)
ALMATY. QazAqparat - Almaty polıtsııasy velosıped urlap, kún kórip júrgen 24 jasar almatylyqty ustady. Er adam jurttyń qaraýsyz qaldyrǵan múlkin arzan baǵaǵa satyp, azyq-túlik satyp alyp júrgen.
«Kúdiktiniń Bostandyq aýdanynda bolǵan 4 qylmysqa qatysy bar bolyp shyqty. Sońǵy ret onyń áreketi «Orbıta» shaǵynaýdanyndaǵy aýlalardyń birinde ornalasqan beınekameralardyń birine túsip qalǵan. Jedel izdestirý sharalarynyń arqasynda onyń kim ekendigi anyqtaldy. Qazir ol qylmysyn moıyndady», - dedi Bostandyq aýdany ІІB basshysy Berik Ábilbekov.
Polıtsııanyń habarlaýynsha, ol buǵan deıin de qylmystyq jaýapkershilikke tartylyp, jazasyn túrmede ótep shyqqan.
Qazir onyń ózge de qylmystarǵa qatystylyǵy tekserilip jatyr.
