Tek tatýlyqty tý etip kelgen halqymyz yntymaq-birliginen aırylmasyn - Qyrymbek Kósherbaev

NUR-SULTAN. QazAqparat – QR Memlekettik hatshysy Qyrymbek Kósherbaev Qordaı aýdanynda oryn alǵan oqıǵa saldarynan qaza tapqandardyń otbasylary men týystaryna kóńil aıtty, dep habarlaıdy QazAqparat tilshisi.

«Ótken aptada Qordaı aýdanynda oryn alǵan tótenshe jaǵdaıǵa baılanysty qaıtys bolǵandardyń otbasylaryna jáne týǵan-týystaryna kóńil aıtamyz. Eren tirlikti, egemen birlikti, tek tatýlyqty tý etip kelgen halqymyz yntymaq-birliginen aırylmasyn dep tilek aıtaıyq», - dedi Aqordada Abaı men ál-Farabıdiń mereıtoılaryna ótkizý jónindegi komıssııanyń otyrysyn ashqan Qyrymbek Kósherbaev.

Memlekettik hatshy bıyl mereıtoıylaryn atap ótip otyrǵan Abaı men Ábý Nasyr ál-Farabıdiń de urpaqqa mura etip qaldyrǵan jaýhar oılarynyń túpki negizi eldiń birligin saqtaýǵa arnalǵanyn eske salyp ótti.

«Abaı «Adamzattyń bárin súı, baýyrym dep» amanatyn aıtsa, Ál-Farabı «Naǵyz baqytqa keneltetin ister adamdardy bir-birine kómektesý úshin biriktiretin qala – qaıyrymdy qala. Al baqytqa jetý jolynda bir-birine qol ushyn beretin qoǵam – qaıyrymdy qoǵam» dep ósıetin qaldyrǵan», - dedi ol.