Tek qorǵanysta jatyp qalmaımyz — «Qaırat» bapkeri «Real Madrıdke» qarsy oıyn jaıly

ALMATY. KAZINFORM — ÝEFA Chempıondar lıgasynyń toptyq kezeńi aıasynda 30 qyrkúıek kúni Ortalyq stadıonda «Qaırat» pen «Real Madrıd» arasyndaǵy oıyn ótedi. 

Match aldynda «Qaırat» fýtbol klýbynyń bas bapkeri Rafael Ýrazbahtın jáne komanda oıynshylary Ádilet Sadybekov, Aleksandr Shırobokov brıfıng ótkizdi. Rafael Ýrazbahtın mańyzdy oıyn aldynda komandanyń daıyndyǵy týraly aıtty.

— Alǵashqy oıynda kishkene qobaljý sezildi. Biraq qazir biz joǵary deńgeıde 9 match ótkizdik. Sondyqtan jigitterde qatty ýaıym bolady dep oılamaımyn. Ajıotaj ben mundaı emotsııalarǵa úırenip qaldy. Qosymsha qysym bolmaıdy, qaıta olar úshin motıvatsııa bolady, — dedi ol.

Sondaı-aq bapker Chempıondar lıgasynyń aldyńǵy oıyndarynda qoldanylǵan shemaǵa kútpegen ózgerister engizilmeıtinin aıtty.

— Mundaı qarsylastarmen tek alǵa umtylyp shabýyldaı berý nemese kerisinshe tek qorǵanysta jatyp alý múmkin emes eken. Munda tepe-teńdik kerek. Olarda jeke sheberligi myqty fýtbolshylar kóp, mundaı qarsylasqa qarsy áreket etý ońaı emes. Keı oıynshylardyń qımylyn jaýyp, ózimizge artyqshylyq týdyratyn sátterdi oılastyrý qajet. Óıtkeni bir-birge qalyp, qorǵanys jasaý qıynǵa túsedi. Biraq biz tek qorǵanysta otyra bermeımiz. Barlyq matchta shabýyl men qorǵanysty qatar alýǵa tyrysyp kelemiz, — dedi ol.

Rafael Ýrazbahtın Chempıondar Lıgasynyń 15 dúrkin chempıony Qazaqstanǵa kelýi — búkil qazaqstandyq fýtbol úshin tarıhı oqıǵa ekenin atap ótti.

— Qýanyshtysy, match Almatyda ótedi. Jankúıerler buryn tek teledıdar arqyly kórgen álemdik fýtbol juldyzdaryn kózbe-kóz kóre alady. Bul oıyndy biz úlken úmitpen kútip otyrmyz. Sondyqtan laıyqty óner kórsetýge tıispiz. Qazir qandaı da bir nátıje týraly aıtqym kelmeıdi, biraq eń bastysy — sapaly oıyn kórsetýimiz kerek, — dedi ol.

Eske salaıyq, buǵan deıin «Qaırat» qaqpashylary Temirlan Anarbekov pen Zarýtskııdiń jaǵdaıy qalaı ekenin jazǵanbyz.