Tek qazýdy emes, eskertkishti saqtaýdy oılaý kerek - Ábilseıit Muqtar arheologııa jaıly
ALMATY. KAZINFORM – «Saraıshyq» memlekettik tarıhı-mádenı mýzeı-qoryǵynyń dırektory Ábilseıit Muqtar arheologııalyq qazba jumystaryna qatysty ózgeris qajet ekenin aıtty.
Qazaqstan memlekettik ortalyq mýzeıinde Joshy ulysy kezeńiniń jádigerleri qoıylǵan kórme ashyldy. Sondaı-aq kórme aıasynda ǵalymdar men tarıhshylar qatysqan «Altyn Ordanyń tarıhı-mádenı muralary: qorǵaý, qaıta qalpyna keltirý jáne zertteý máseleleri» taqyrybynda respýblıkalyq dóńgelek ústel ótti.
Jıyn barysynda «Saraıshyq» memlekettik tarıhı-mádenı mýzeı-qoryǵynyń dırektory, tarıh ǵylymdarynyń doktory Ábilseıit Muqtar Atyraý oblysynda júrgizilgen arheologııalyq zertteýlerdiń nátıjesimen bólisti.
- Sońǵy jyldary bizdiń mýzeı-qoryqtyń ǵalymdary Altyn orda dáýiriniń eskertkishterine zertteý júrgizdik, dalaǵa ekspedıtsııa jasadyq. Nátıjesinde jańadan Qaraǵaıly qalashyǵy, Aşysaı qalashyǵy jáne Kúlish kerýen saraıy tabyldy. Bul oryndar - óz zamanynda belgili bir dárejede Joshy ulysynyń áleýmettik-ekonomıkalyq saıası damýyna úles qosqan iri eldi mekender. Odan bólek oblys boıynsha 10-nan astam osy dáýirdiń turaqtarynyń orny anyqtaldy. Onda Ózbek han men Jánibek han tusyndaǵy tıyndar tabyldy, - dedi ol.
Sondaı-aq Ábilseıit Muqtar óz sózinde arheologııalyq qazba jumystaryn júrgizýde túbegeıli ózgeris qajet ekenin atap ótti. Onyń aıtýynsha, aldaǵy ýaqytta tarıhı oryndardy tek qazýdy maqsat tutpaı, ony qorshap, ústin jaýyp, saqtaýdyń joldaryn birden qarastyrý qajet. Qazirgi ýaqytta qazylǵan oryndardan tek jádigerler alynady da, ol qaıta kómiledi ne ashyq qalady.
- Biz tek qazba jumystarymen aınalysyp júr ekenbiz. Al tabylǵan oryndy saqtaý jaǵy qalyp qoıady, saqtaýdyń, qalpyna keltirýdiń joly aýyr. Sondyqtan bolashaqta daıyndaıtyn ǵylymı jobalarymyzda shaǵyn ǵana jerdi alyp, sony ǵana qazyp, ony saqtaýdy jolyn birden qarastyrýymyz qajet. Osyny úılestiretindeı memlekettik deńgeıde ózgeris bolǵany jón. Shetelde qazbadan buryn pavılon salynady. Sodan keıin ǵana jer qazylady. Bizge osy ǵylymǵa kózqarasty ózgertý qajet. Bolashaq urpaq aldynda jaýapkershiligimiz bar, - dedi mýzeı-qoryq dırektory.
Eske salaıyq, byltyr Atyraý oblysynyń eki aýdanynda arheologııalyq qazba jumystary júrgizilgenin jazǵanbyz.