Tek qaǵaz júzinde tirkelgen mal tizimnen shyǵaryldy
ASTANA. KAZINFORM — Aýyl sharýashylyǵy mınıstrligi sanda bar da, sanatta joq mal sanyn tizimnen shyǵarý jumystaryna túsinik berdi.
- Agroónerkásiptik keshendi damytýdaǵy júıelik máselelerdiń biri – salanyń statıstıkalyq derekteriniń burmalanýy. Memleket basshysynyń tapsyrmasyna sáıkes, jergilikti atqarýshy organdar jáne Ulttyq statıstıka bıýrosymen birlesip, mal sharýashylyǵy salasyndaǵy statıstıkalyq derekterdi naqtylaý, sondaı-aq mal sharýashylyǵy ónimderi óndirisi men mal basy sanyndaǵy eseptilikke qatysty aýqymdy jumys atqaryldy, - delingen mınıstrliktiń Kazinform agenttigine bergen jaýabynda.
Nátıjesinde mal sany men ónimi týraly jalǵan derekter tizimnen joıylǵan.
- Shamamen 1,9 mln iri qara mal, 3 mln usaq mal, 3 mln tonna sút jáne basqa da málimetter tizimnen shyǵaryldy. Bul rette, tizimnen shyǵarylǵan maldyń negizgi bóligi jeke qosalqy sharýashylyqtarǵa tıesili, - dep naqtylaıdy mınıstrlikten.
Vedomstvo aqparatyna qaraǵanda, 2024 jyldyń 12 aıynyń qorytyndysy boıynsha elimizdegi barlyq sharýashylyq sanattarynda mal men qus sany 2023 jyldyń sáıkes kezeńimen salystyrǵanda artqan.
- Bul turǵyda iri qara mal sany - 7 842,6 myń (118,5%), usaq mal sany - 20,1 mln (108,1%), jylqy sany – 4 217,4 myń (109,5%), túıe sany - 281,6 myń (106,3%), qus sany - 45,2 mln (102,6%), - dep atalyp ótken Aýyl sharýashylyǵy mınıstrligi aqparatynda.
Prezıdent Qasym-Jomart Toqaev 2024 jylǵy Joldaýynda eldegi maldyń sany qoldan kóbeıtilgenin atap, qujattaǵy 5 mln bas maldyń ómirde joq bolyp shyqqanyn aıtqan bolatyn.
Byltyr kúzde Strategııalyq josparlaý jáne reformalar agenttigi Kazinform saýalyna joldaǵan jaýapta eldegi mal sanyn qoldan kóbeıtip jazǵan óńirlerdi atap kórsetti.