«Tek gúl otyrǵyzasyń»: Uldana Myrzýan isindegi aıyptalýshy úıdiń jaı-kúıi týraly
ASTANA. KAZINFORM — Jedel járdem feldsheri Uldana Myrzýannyń qazasyna qatysty sot otyrysynda aıyptalýshy Sáýle Jubanııazova Múlik ıeleri birlestiginiń tóraǵasy bolyp jumys istegen alǵashqy aılary jáne úıdi qandaı jaǵdaıda qabyldap alǵanyn aıtyp berdi.
— Múlik ıeleri birlestigi qurylǵannan keıin barlyq uıymdastyrý máselesimen aınalystym. Onyń ishinde kireberisti, úıdi, aýlany tazalaý, jylý torabyn kútip ustaý, kórsetkishterdi berý jumystary boldy. Keıin úıdi qysymmen tekserý jumystary bastaldy, — dedi sottalýshy.
Onyń aıtýynsha, OSI jumysy jolǵa qoıylǵannan keıin aı saıyn shamamen 500 myń teńge qarajat túsip otyrǵan. Qarajattyń edáýir bóligi tazalyqshynyń, aýla sypyrýshynyń jáne santehnıktiń jalaqysyna, sondaı-aq salyq, deratızatsııa, bank qyzmetteri jáne basqa da shyǵyndarǵa jumsalǵan.
S. Jubanııazova úıdi buǵan deıin basqarǵan Gúljaýhar Ahmetovadan qujattardy qabyldap alǵany týraly da aıtyp berdi. Onyń sózinshe, isti tapsyrý kezinde G. Ahmetova úıdiń jaǵdaıy jaqsy ekenin aıtqan.
— Ahmetova maǵan qujattardy tapsyrǵanda úıdiń jaǵdaıy óte jaqsy ekenin, bárin ózi jasap qoıǵanyn aıtty. Dálme-dál aıtqan sózin keltirsem, «Tek gúl otyrǵyzasyń» degen edi, — dedi S. Jubanııazova.
Sottalýshy qujattardy qabyldap alǵan kezde úıge qatysty tehnıkalyq saraptama qorytyndysy berilmegenin jetkizdi.
— Qazir maǵan «sen tehnıkalyq saraptamany kórdiń, osy qaıǵyly jaǵdaıdyń aldyn alýǵa bolatyn edi» dep aıtyp jatyr. Biraq men bul saraptamany alǵan joqpyn. Ony kórgen de emespin. Qujatpen osydan eki apta buryn ǵana Turǵyn úı basqarmasynda tanystym. Qylmystyq is aıasynda bul saraptama jarııalan kezde, barlyǵy habardar bolýy úshin ony turǵyndarǵa da jetkizdim, — dedi ol.
S. Jubanııazova qyzmetine kirisken kezde turǵyndar qasbetke qatysty qandaı da bir shaǵym aıtpaǵanyn atap ótti.
— Men qyzmetke kirisken kezde turǵyndar eshteńege shaǵymdanǵan joq. Bizde eshqandaı jaryqshaq, qıraý bolǵan joq. Sondyqtan qasbettiń sol bóligi qandaı da bir ólim qaýpin tóndiredi dep tipti oılaı almadym, — dedi sottalýshy.
Buǵan deıin qurylys salasynyń mamany Veronıka Lobaeva turǵyn úıdiń qasbeti ne sebepti qulaǵanyn aıtqan edi.
