Tek Elbasy ǵana bizdiń júıeni jańa deńgeıge kótere alady - A. Aqanov
ALMATY. 16 naýryz. QazAqparat /Ádilet Musahaev/ - Quramynda álemniń 16 eliniń balalary oqıtyn Qazaq Ulttyq medıtsınalyq ýnıversıtetiniń on myńnan asatyn ujymy óz bolashaǵyn N.Á. Nazarbaevpen baılanystyrady.
Bul jaıynda atalǵan ýnıversıtettiń rektory Aıqan Aqanov Elbasyny qoldaýǵa baılanysty ótkizgen jıyn barysynda aıtty.
Keshe S.D.Asfendııarov atyndaǵy QazUMÝ-da "Jastar Prezıdentti qoldaıdy" atty aktsııa ótip oǵan, 800-ge tarta stýdent pen oqytýshy qaýym jáne "Nur Otan" HDP-nyń qalalyq shtabynyń tóraǵasy Mahambet Beıdáli jáne taǵy basqa qoǵam qaıratkerleri qatysty.
Sharany M. Beıdáli ashyp, alda kele jatqan saılaý barysymen tanystyryp ótti. "3-shi naýryzdan bastap biz úgit-nasıhat jumystaryn bastadyq, Almatyda prezıdentikke úmitker N.Á. Nazarbaevty qoldaýǵa baǵyttalǵan 8 shtab quryldy. Onyń quramynda Almatynyń bedeldi adamdary men bilim, óndiris, áleýmettik salasynyń ókilderi men Uly Otan soǵysynyń ardagerleri jáne jastar bar. Sondyqtan jastar sizder de elimizdiń órkendep, kórkeıe túsýi úshin durys tańdaý jasaýlaryń kerek", -dep atap ótti M. Beıdáli.
"Búgin bul jıynǵa dárigerler men erteńgi kúngi dárigerler sııaqty ár býyn ókilderi kelip otyr. Barlyǵymyz 3-shi sáýir kúni saılaýǵa barýymyz kerek. Qazirgi tańda qoǵamnyń barlyq salasynda órkendeý oryn alýda, biz ony toqtatýǵa qaqymyz joq. Tek Elbasy ǵana bizdiń júıeni jańa deńgeıge kótere alady. 20 jylda kóptegen jetistikke jettik. Sondyqtan da qolǵa alǵan reformany jalǵastyryp, óz bolashaǵymyzdy Prezıdentpen birge tańdaýymyz kerek", -dep atap ótti óz sózinde ýnıversıtet rektory.
