Tek bir jerde ǵana shyǵarylatyn, ózindik tarıhy bar ónim zańmen qorǵalady

ASTANA. KAZINFORM - Qazaqstan zańnamasyna jańa zııatkerlik menshik obektisi engizildi. Sonyń arqasynda endi óndirýshiler tek óz óńirinde ǵana shyǵatyn ónimdi ulttyq brend retinde damytýǵa múmkindik alady. Bul týraly QR Ádilet vıtse-mınıstri Botagóz Jaqselekova aıtty.

— Jaqynda Qazaqstan zańnamasyna jańa «geografııalyq nusqama» zııatkerlik menshik obektisi engizildi. Geografııalyq nusqama uzaq tarıhy bar jáne shyqqan jerimen, tabıǵaty jáne mádenıetimen tyǵyz baılanysy bar aýylsharýashylyq ónimderine, azyq-túlikke, sharaptarǵa jáne spırttik sýsyndarǵa, qolóner jáne ónerkásiptik ónimderge silteme jasaý úshin qoldanylady. Ony tirkeý Qazaqstannyń ártúrli óńirlerinde óndiriletin taýarlardyń ulttyq brendin damytýǵa, sondaı-aq olardyń álemdik naryqta tanymaldylyǵyn, ınvestıtsııalyq tartymdylyǵyn arttyrýǵa jáne týrıstik salany damytýǵa yqpal etedi, - dedi ol. 

Vıtse-mınıstrdiń aıtýynsha, tirkeý sanyn ulǵaıtý jáne geografııalyq nusqamany kórsete otyryp tirkeý boıynsha bıznestiń habardarlyǵyn arttyrý maqsatynda bıyl oblystardyń jáne Respýblıkalyq mańyzy bar qalalardyń ákimdikterimen jumys jandandyryldy. Jyl basynda Túrkistan qalasynda «geografııalyq nusqamalardy quqyqtyq qorǵaý jáne olardyń ulttyq brendterdi ilgeriletýdegi róli» taqyrybynda semınar ótti.

— Aǵymdaǵy jyldyń naýryz-jeltoqsan aralyǵynda geografııalyq nusqama memlekettik tiziliminde tirkelgender sany 5-ten 38-ge deıin ósti jáne 140 ótinim Ulttyq zııatkerlik menshik ınstıtýtynyń qaraýynda. 

Jalpy, jańa tirkeýlerdiń qatarynda Qazaqstanda túıe sútinen jasalǵan Aral sabyny, Qyzylorda kúrishi, Talǵar almurty, Narynqol kartoptary, Kókshetaý balmuzdaqtary, Katonqaraǵaı tabıǵı baly, Qaraǵandy broıleri, Otyrar shubaty, Qostanaı baly, Saıram nany, Alakól balyǵy jáne basqalary bar, - dedi Botagóz Jaqselekova.