Tek byltyrdyń ózinde 3,6 mıllıon adam memleket esebinen tegin dári-dármek aldy – Toqaev
ASTANA. KAZINFORM – Prezıdent áleýmettik saqtandyrý júıesi tıimdi jumys istep turǵanyn jáne jumyssyz qalǵan, asyraýshydan aırylǵan jáne eńbekke jaramsyz adamdarǵa arnaıy kómek beriletinin aıtty.
— Men medıtsına qyzmetkerlerine kúsh kórsetken adamdardy qylmystyq jaýapkershilikke tartý týraly zańǵa jyl basynda qol qoıdym. Táýelsiz Memleketter Dostastyǵy elderiniń kóbinde mundaı norma joq.
Sonymen qatar basqa eldermen salystyrǵanda Qazaqstan halqyna aqysyz medıtsınalyq kómek alýǵa zańmen kepildik berilgen. Tek byltyrdyń ózinde 3,6 mıllıon adam memleket esebinen aqysyz dári-dármek alǵan.
Elimizde Áleýmettik saqtandyrý júıesi tıimdi jumys istep tur. Jumyssyz qalǵan, asyraýshydan aırylǵan jáne eńbekke jaramsyz adamdarǵa arnaıy kómek beriledi, — dedi ol.
Bıyl osyndaı áleýmettik tólemderdiń kólemi 10 paıyzǵa ulǵaıdy.
— Búginge deıin 660 myńnan astam adamǵa shamamen 70 mıllıard teńge qarjylaı qoldaý kórsetildi. Osy jyly járdemaqynyń barlyq túriniń, bazalyq jáne ortaq zeınetaqynyń mólsheri 10 paıyzǵa kóbeıdi.
Munyń bári — Qazaqstanda dúnıege kelgennen bastap ómir boıy beriletin áleýmettik kómektiń azdaǵan bóligi ǵana.
Ókinishke qaraı, memlekettiń mundaı qoldaýyn kópshilik tıisti deńgeıde baǵalaı bermeıdi, ony solaı bolýǵa mindetti dep qabyldaıdy, aspannan shuǵa jaýǵandaı kóredi.
Halyqaralyq sarapshylar úkimetterge qoǵamda jalqaýlyq beleń alyp, azamattardyń jumys qabiletiniń tómendeýi múmkin ekeni týraly eskertýde, — dedi Memleket basshysy.
Prezıdent keıbir ar-uıaty joq adamdar, qarapaıym tilmen aıtqanda, alaıaqtar, eshqandaı quqyǵy bolmasa da áleýmettik kómek alýdyń qylmystyq joldaryn jasaǵanyn aıtty.
— Aıtpaqshy, jaqynda áıgili Ilon Mask osy taqyrypta sóz sóılep, áleýmettik júıelerdegi «shekten tys jomarttyqtyń» zııanyn jetkizdi. Osy tektes boljamdar men málimdemelerdi jıi kóremiz.
Sonymen qatar keıbir ar-uıaty joq adamdar, qarapaıym tilmen aıtqanda, alaıaqtar, eshqandaı quqyǵy bolmasa da áleýmettik kómek alýdyń qylmystyq joldaryn jasaǵan. Bul jóninde buǵan deıin de aıtqanmyn.
Mundaı qylmyskerler eń áýeli memlekettik qoldaýǵa shyn muqtaj jandardy tonap otyr. Sondyqtan áleýmettik kómekti tıisti adresine jetkizý úshin aýqymdy jumys júrgizemiz.
Sheteldikter elimizdegi áleýmettik qoldaý júıesi osynshama joǵary deńgeıde ekenine tań qalady. Sebebi mundaı kómek kez kelgen elde kórsetile bermeıdi. Ashyǵyn aıtsaq, keıbir memleketter osyndaı qoldaý jasaýǵa qulyqty emes, — dedi Toqaev.
Aıta ketelik Prezıdent qatysýymen máslıhat depýtattarynyń ІІІ respýblıkalyq forýmy ótip jatyr.
