Tehretteý jáne metrologııa komıteti 6 aı ishinde taýar sapasyna baılanysty tártip buzýshylarǵa 250 mln teńgeden astam aıyppul salǵan
ASTANA. 16 shilde. QazAqparat - Indýstrııa jáne jańa tehnologııalar mınıstrliginiń Tehnıkalyq retteý jáne metrologııa komıtetiniń sońǵy 6 aı ishinde túrli nysandaǵy jekemenshik sharýashylyq sýbektilerinde ólshem quraldary jaǵdaıyn jáne paıdalanylýyna, tehnıkalyq reglamentter talaptarynyń saqtalýyna júrgizgen tekseristeri nátıjesinde talaptardy buzýshylar jalpy kólemi 250 540 020 teńgege ákimshilik jaýapkershilikke tartyldy. Bul týraly búgin ótken baspasóz máslıhatynda komıtet tóraǵasy Ryskeldi Sátbaev málim etti.
Onyń aıtýynsha mundaı tekserister barlyǵy 1 477 nysanda ótkizilip, olardyń 858-inen talapqa saı emes taýarlar tabylǵan.
Sonymen qatar, barlyq túrli tekseristerdiń nátıjeleri boıynsha sapasy tómen, tańbalaýsyz jáne sáıkestik sertıfıkattary joq 977 261 myń teńge somasyndaǵy túrli ónimniń 4 986 partııasyn iske asyrýǵa tyıym salynǵan.
Komıtet tóraǵasynyń aıtýynsha, azyq-túlik ónimderin óndiretin kásiporyndarǵa júrgizilgen 327 tekseristiń 191 jaǵdaıynda buzýshylyqtar anyqtalsa, balalar oıynshyqtaryn satatyn oryndarǵa júrgizilgen 46 tekseris nátıjesinde 33 zań buzýshylyq baıqalǵan.
